Skandal/ Rama u shkatërron pronat 200 banorëve të Tiranës

Skandal/ Rama u shkatërron pronat 200 banorëve të Tiranës


Rama tregon dhe një herë se mund ta shkelë ligjin sa herë të dojë. Me një veprim tepër racist dhe tërësisht arbitrar, kryetari i Bashkisë së Tiranës ka urdhëruar shembjen e një sërë objekteve, mes të cilave dhe shtëpi banimi të disa banorëve të kryeqytetit. Bashkia e Tiranës, me një veprim të nxituar, që pritet të ketë më pas pasoja ligjore, po prish mbi 70 shtëpi, të cilat kanë rreth 200 banorë të strehuar në to. Rama nxjerr 70 familje në rrugë, pjesa më e madhe e të cilave jetojnë në objekte me dokumenta të rregullta. Duke treguar një arbitraritet me banorët e zonës, Policia Bashkiake nuk ka paralajmëruar shkatërrimin e shtëpive të tyre, por ka ndërmarrë një aksion të menjëhershëm duke lënë të pastreha një numër të konsiderueshëm banorësh. Me urdhër të vetë kryetarit të Bashkisë, Policia Bashkiake ka vendosur që të prishë këto shtëpi, të cilat ndodhen në anë të Lanës, mbi Spitalin Gjinekologjik "Koço Glozheni".

Këto shtëpi që njerëzit e Ramës po i prishin, datojnë të ndërtuara nga viti 1939 deri në vitin 1992. Prej disa kohësh, firmat e ndërtimit pranë Ramës i kanë lajmëruar këta banorë se po nuk u ujdisën për të bërë ndërtesa shumëkatëshe, që në këtë zonë janë me bollëk, atyre do t'u shembet shtëpia dhe nuk do të fitonin asgjë. Por kjo, sipas banorëve, nuk është marrë seriozisht, sepse ata disponojnë dokumente të rregullta. Disa prej banorëve janë lajmëruar për këto shembje, të cilat janë bërë tepër në fshehtësi dhe duke përdorur forcën. Por, paradoksi qëndron se askush nuk u ka premtuar atyre dëmshpërblime në para dhe as shtëpi, ku ata të qëndrojnë pasi të prishen banesat e tyre. Ndërkohë që pasi ka vërtetuar tek noteri pronën e tij, Memo Malaj, prona e të cilit është e regjistruar në Zyrën e Regjistrimit të Pasurive të Paluajtshme më datë 01.08.1994, i është konfirmuar prishja e banesës dje nga Inspektoriati i Ndërtimit, me përfaqësues Gjergji Likaj dhe Mark Parkolaj.

Këtij kryefamiljari si dhe kryefamiljarëve të tjerë nuk u është dhënë asnjë fije shpresë nga Bashkia se ku do të fusin kokën gjatë ditëve në vazhdim. Tashmë, të gjithë njerëzit që jetojnë në këtë zonë, janë çdo çast e më tepër të rrezikuar për të dalë në mes të katër rrugëve. "E si mund të na prishen shtëpitë pa na dhënë dëmshpërblim, kompensim apo shtëpi të tjera?" - ankohen këta qytetarë që tashmë rrezikojnë të mbeten jashtë. "Me çfarë të drejte na nxjerrin në rrugë? Kush është ky Rama që pak se po na pi gjakun dhe është bërë milioner me djersën tonë, sot na nxjerr jashtë", u shprehën të irrituar banorët, të cilët po konfrontoheshin me Policinë Bashkiake. Ndërkohë që në gjyq me Bashkinë po shtohen gjithnjë e më shumë familjarë të tjerë. Deri tani janë në gjyq me Bashkinë 4 familje, por, sipas banorëve, në ditët në vazhdim pritet që gjyq të hapin dhe 10 familje të tjera të prekura nga shembjet. Disa familje do të hapin ditën e sotme gjyq për dhunim banese nga ana e Policisë Bashkiake. Të gjithë banorët janë të vendosur dhe pohojnë se nuk do të dalin nga shtëpitë e tyre, edhe në rast se i marrin me fadromë e shuplaka, siç ka ndodhur këto dy ditë. Le t'i shembin shtëpitë edhe me ne brenda, - pohojnë banorët, - nuk e duam më jetën pa shtëpi.

Në mëngjesin e djeshëm, në këtë lagje mbërritën furgonat e Policisë Bashkiake si dhe fadromat e Inspektoriatit të Ndërtimit të Bashkisë së Tiranës, të cilët tentuan që me forcë të prishnin shtëpitë e banorëve. Të gjithë qytetarët e kundërshtuan me forcë prishjen e banesave të tyre dhe ishin të gatshëm që të përlesheshin me policinë bashkiake, për të mbrojtur banesat e tyre. Policia nuk arriti që të zgjidhte asgjë dhe arriti të përdorte dhunën ndaj tyre, megjithëse mundi të prishte vetëm disa magazina dy ditë më parë, duke kërcënuar se ky ishte vetëm fillimi dhe se ata do të prishnin të gjithë lagjen. Dje, ata donin të shembnin disa shtëpi të tjera, por shiu me rrebesh që ra në Tiranë, e pengoi aksionin për t'i nxjerrë në rrugë këto 71 familje.

Nesti Nako pohoi se "policët e Bashkisë përdorën dhunë ndaj nesh, duke na goditur, madje i bënë presion dhe vajzës time Alda, duke i thënë se gjej ndonjë vend në rrugë ku të flesh tashmë". Një vend e ke thanë më tej policët që, në fakt, të gjithë i ngjanin si Edi Rama. "Vend i përshtatshëm është dhe lulishtja e Lanës ku ti thith dhe ajër të pastër", ironizonte policia bashkiake banorët. Presionet nuk kanë të sosur nga policët bashkiakë, të cilët, me paturpësinë më të madhe, tallen me djersën e qytetarëve, që brez pas brezi janë munduar të ndërtojnë shtëpi dhe të bëjnë një jetë më të mirë. Ky është një terror që kjo polici u bën këtyre njerëzve, që shtëpitë e tyre i shohin të rrezikuara jo nga një tërmet apo fatkeqësi natyrore, por nga Edi Rama, të cilit nuk iu plotësua dëshira për të ndërtuar pallate në këtë zonë. Të gjithë banorët e lagjes së vjetër tiranase kanë dokumenta origjinale për banesat e tyre. Por, çuditërisht, tapitë dhe dokumentet e shtëpive të qytetarëve të Tiranës Rama i ka shpërfillur, duke i quajtur si letra bakalli. "Kur morëm lajmin se do të na prisheshin shtëpitë, shkuam dhe u interesuam, pasi na u kërkuan dokumentet e pronësisë nga ana e Bashkisë. Dërguam të gjitha dokumentet që kishim, në të cilat vërtetohej se këto shtëpi ishin tonat. Në to ne kishim tapitë origjinale si dhe aktet e shit-blerjes që ishin të kohës së pushtimit italian në Shqipëri. Bashkë me to, ne kishim dërguar dhe shumë dokumente të tjera si, certifikatat tona personale dhe ato të trungut familjar. Na janë zhdukur të gjitha dokumentat që kemi depozituar në bashki", u shprehën banorët. "Ne tashmë jemi më se të bindur se Bashkia i ka zhdukur dokumentet, në mënyrë që shtëpitë tona të dalin të paregjistruara, që të na i prishë kollaj dhe të mos përfitojmë asgjë", u shprehën të indinjuar banorët. "Por gjykata e zgjidh, se ne kemi në shtëpi kopjet origjinale, se e kuptuam hilen e Ramës që na tha të çonim në bashki dokumentet origjinale", thanë ata. Kujtojmë këtu se Rama deklaronte para këshilltarëve të djathtë në Bashki se nuk do të shembte asnjë shtëpi në një zonë informale për ndërtimin e një shkolle. Ne, deklaronte Rama përballë këshillit, nuk prishim shtëpi dhe vepra të tjera, është qeveria që i prish. Por në të vërtetë, Rama nuk kishte interes që të shembte një shtëpi në një lagje për të bërë shkollë, sepse shkolla nuk i mbush xhepat e tij.


Banorët e quajnë Ramën fashist dhe njeri pa ndjenja


Pasi u endën me ditë të tëra dyerve të institucioneve shtetërore, me shpresën se do të gjenin zgjidhje për hallin e tyre, qytetarët iu drejtuan më në fund të vetmit njeri që si gjykatës suprem vendosi shembjen e shtëpive të tyre, kryebashkiakut Edi Rama. "Shpresa vdes e fundit". Por fatkeqësisht, proverbi i urtë popullor nuk ka funksionuar me kreun e Bashkisë së Tiranës, që paraja ia ka errësuar sytë. Përgjigjja e Ramës ka qenë fatale. Suzana Meja si dhe e bija e saj pohuan se "sot në mëngjes, një nga komshinjtë tanë, Jetnor Malaj, shkoi ta takonte vetë kryebashkiakun, duke i kërkuar atij një zgjidhje. Ai, duke i nxjerrë përballë një nga maluketrit e tij, me indiferencën më të madhe i ishte përgjigjur se ajo lagje do të rrafshohej. Kjo gjë është vendosur prej kohësh dhe nuk ka as edhe një mundësi që ky vendim të ndryshojë", përsëriti ajo fjalët e punonjësit të Bashkisë. E tronditur, ajo tha se kryebashkiaku i ngjan një fashisti si Musolini, që fitoi mbështetjen e fshatarëve dhe i shkatërroi pasanikët dhe pronarët. Kjo ishte goditja fatale për këta banorë, pasi u ishin mbyllur disa dyer zyrash në institucione të ndryshme si njësia bashkiake 1, ku ata kishin kërkuar ndihmë. Maliq Zeqiri tha se ishte banor në atë shtëpi qyë në vitin 1950 dhe dispononte dokumenta të rregullta, të cilat Rama i injoron. Kryebashkiaku, shtoi më tej ai, është personi që ka urdhëruar të na rrahin si të ishim kafshë. Jetnor Malaj, i cili i kishte kërkuar personalisht takim Ramës, i zhgënjyer prej tij shprehet se "në rast se Rama bëhet kryeministër, atëherë do të iki jashtë shtetit, nuk durohet të bëhet ai udhëheqësi im. Kam tre fëmijë dhe po m'i hedh në rrugë, me ç'të drejtë? Dua t'i them Ramës se po të na i shembë shtëpitë me pa të drejtë, këtu do të ndodhin katastrofa. Ai u kërkoi mediave pranë Ramës që të pasqyrojnë këtë katastrofë njerëzore që po shkakton Bashkia e Tiranës, vetëm për të mbushur xhepat e kryetarit. "Një krahasim të fundit kam për të gjithë këta qytetarë që harrojnë bëmat e Ramës dhe e votojnë. Në kohën kur në Tiranë ishte Sali Kelmendi kryetar i Bashkisë, çdo të premte populli merrte takim të drejtpërdrejtë. Kurse tani duhet të shkosh në ndonjë fshat që ta takosh Ramën", tha një qytetar. Eni Nako tha se në shtëpinë e tij është konsumuar një vepër penale, pasi një inspektor i Bashkisë ka hyrë në shtëpi pa lajmëruar dhe ka filluar të prishë muret e shtëpisë. "Ky është dhunim banese dhe për këtë, Policia Bashkiake do të përballet në gjyq me familjen time. Nuk ka të drejtë të shembë njeri asnjë shtëpi pa paralajmërim dhe pa të sqaruar se pse po të shembet shtëpia".