Edi Rama, leje ndërtimi Delijorgjit te parku i autobusëve dhe uzina “Dinamo”

Fenomeni Delijorgji nuk është fenomen që ka përfshirë vetëm klikën “Berisha”, por edhe opozitën shqiptare, ose më mirë me thënë klikën “Rama”. Tashmë ky fenomen është shndërruar në një rrezik për shoqërinë shqiptare, duke bërë evident faktin se e gjithë politika shqiptare është mbërthyer nga kthetrat e mafies. Nëse nga data 15 mars deri më sot është bërë evident fakti, që Sali Berisha është njeriu i përzierë familjarisht në aferën “Delijorgji” dhe aferën “Gërdec”, fakti tjetër që të tmerron, është se në të gjithë këtë aferë janë përzierë të gjithë bashkë, të majtë dhe të djathtë, pozitë dhe opozitë.Të gjithë në unison në qendër të aktivitetit të tyre politik kanë si qëllim fashitjen e skandalit të Gërdecit dhe të trafikut të armëve, pa pasur në mendje intensifikimin e luftës të tyre kundër pushtetit okult të Berishës. I pari është Ilir Meta që në mënyrë të qëllimshme u largua nga loja opozitare, duke iu kthyer opozitës me kreun e PS Rama, për shiun që ra në rrugën “Komuna e Parisit”, kur gjithë Shqipëria vajtonte për Gërdecin. Për të vazhduar më tej me Ramën, Majkon, Gjinushin e kompani. Fakti më determinant i përfshirjes së opozitës është se janë edhe dy deputetë socialistë të përfshirë në këtë aferë. Kush janë emrat askush nuk i bën të ditur? Por një fakt shumë sinjifikativ dhe tronditës, është se në lojën Delijorgji na është përfshirë edhe kreu i opozitës Edi Rama. Në lejet e pra të vitit që u miratuan, emri i parë në listën e Edi Ramës ishte emri i Mihal Delijorgjit, emër i përfshirë këto ditë në trafikun e armëve dhe masakrën e Gërdecit. Delijorgji rezulton të ketë marrë leje ndërtim për pallate te parku i autobuzëve në rrugën e Kavajës dhe në uzinën e vjetër “Dinamo”. Kryeopozitari dhe kryebashkiaku Rama na del i përzierë në afera të pista. Në rrugën e Kavajës, Delijorgji ndërtonte mbi një pronë të cilën e ka pasur në pronësi burri i një deputete socialiste. Ndërsa në pronësinë e uzinës “Dinamo” kemi të bëjmë me një pronësi të bashkisë të Tiranës e cila i ka kaluar për ndërtim Delijorgjit. E gjithë afera e Ramës mesa duket është ndërthurur më së miri me të njëjtin biznesmen që është i lidhur edhe Sali Berisha. Politika shqiptare flet shumë nëpërmjet shoqërive të përbashkëta të kësaj kategorie, ku politikanë dhe biznesmenë të dyshimtë janë së bashku shkaktarë të tragjedive si ajo e Gërdecit. Nëse bëhet një paralele midis Ramës dhe Berishës del qartë se filli i bashkëpunimit të tyre kalon nëpërmjet qarqeve të shkurtra të bizneseve të pista. Lidhjet mafioze midis Delijorgit-Berishës dhe Rama-Gonxhe mesa duket përfundojnë me pallate që mbyllin sytë e kryeprokurores Rama. Koincidenca e mbiemrave midis kryebashkiakut dhe kryeprokurores përfundon me lidhje të shkurtra Delijorgji-Shkëlzen. Nëse dikush është në gjendje të zgjidhë gjithë këtë rebus mafioz politiko-ekonomik, padyshim që do të marrë çmimin nobël për paqen. Pasi ndërthurja e interesave të tilla nuk po sjell gjë tjetër veçse tragjedi si ajo e Gërdecit dhe korrupsion si ai i Bashkisë së Tiranës. Qerthulli mafioz fillon me Majkon e tankeve, vazhdon me Ramën e pallateve dhe mbyllet me Berishën e predhave. Gjithë politika lundron në liqenin korruptiv të Delijorgjit. Gërdeci mund dhe të harrohej para interesave të Ramës, Berishës, Majkos e shumë krerëve të politikës shqiptare. tashmë në Shqipëri ka triumfuar mafia dhe dhuna. Berisha është një pasues i mjerë i strategjisë korruptive të parardhësve, duke u bërë mjeshtër i organizimit të aferave qindra milionë euro. Tashmë kryeministri ynë nuk përfaqëson figurën e “Plakut Dogsboru” por figurën e “Oqil Oqilovit” të korruptuar. Ndërsa në anën tjetër e “derit Maç”, Edi Rama, përfaqëson më së miri figurën e një despoti të pasuruar me lëk të pista dhe biznese të pista. Të dy së bashku plotësojnë në mënyrë kuptimplote shprehjen e një loje me letra: “ të ka ngelur Deri Maç”. “De fakto” dhe “de jure”, këta të dy i kanë ngelur në derë Shqipërisë si një “nuskë magjie”, që sjell vetëm keq për shqiptarët