KE: Qeveria greke, racizëm ndaj emigrantëve

Raporti i KE-së mbi racizmin dhe ksenofobinë ka kritikuar ashpër Athinën. Kërkohet ndëshkimi i “racistëve”

KE: Qeveria greke, racizëm ndaj emigrantëve

ATHINË - Greqia duhet të marrë masa drastike për të zhdukur fenomenet e racizmit. Raporti i Këshillit të Evropës për betejën kundër racizmit dhe ksenofobisë, ka qenë një shuplakë e vërtetë për Greqinë. Sipas raportit, emigrantët dhe grupe të tjera minoritetesh kanë probleme të shumta përsa i përket zbatimit të të drejtave të tyre. Raporti arrin deri aty sa të kërkojë marrjen e masave drastike për goditjen e fenomeneve të racizmit që lindin. Më konkretisht, të jepen dënime për punonjës të administratës shtetërore, të cilët bëjnë deklarata raciste si dhe ndaj organeve të pushtetit lokal, të cilat në kundërshtim me ligjet nuk pranojnë t’u shërbejnë emigrantëve.
Sipas raportit, procesi i legalizimit të emigrantëve kryhet me probleme. “Deri tani akoma nuk ka një politikë të caktuar për këtë problem, edhe pse emigrantët përbëjnë 10% të popullsisë”,- thuhet në raport. Procesi i dhënies së lejeve të qëndrimit “është i vonuar”, ndërkohë që “një emigranti për të marrë lejen e qëndrimit i duhet të rrijë me orë ose dhe me ditë në radhë përpara bashkisë, prefekturës apo spitaleve”. Gjithashtu shuma e lekëve që paguan një emigrant për ta marrë Lejen e Qëndrimit konsiderohet tepër e lartë dhe Këshilli sugjeron që kjo shumë duhet të ulet menjëherë, pasi kërkohen 150 euro nga njerëz me të ardhura të ulëta ose pa të ardhura. Nga ana tjetër, po sipas raportit, mungojnë ende masat e duhura për përfshirjen e emigrantëve në jetën politike dhe shoqërore të vendit siç është e drejta e zgjedhjes dhe e të zgjedhurit në zgjedhjet lokale për emigrantët, të cilët jetojnë prej vitesh në vend. Probleme sipas raportit, ka edhe në dhënien e azilit dhe megjithë rritjen e numrit të kërkesave vetëm 1% e tyre e fitojnë atë.
Policia dhe organet e drejtësisë
KE propozon ngritjen e një komisioni, i cili të shqyrtojë rastet e dhunës policore ndaj të huajve, duke kërkuar që të dënohen të gjithë ata policë të cilët ushtrojnë dhunë ndaj emigrantëve. Në raport tërhiqet vëmendja se ushtrohet dhunë ndaj emigrantëve nga policë, të cilët mbajnë poste në polici dhe bëhen dëbime masive në kohën kur është duke u zhvilluar procesi i legalizimit. Përsa u përket organeve të drejtësisë, sipas raportit, gjykatësit në shumicën e rasteve nuk kërkojnë përkthyes, megjithë vështirësinë që mund të ketë i pandehuri për të kuptuar greqisht. Gjithashtu shpeshherë gjykatat greke bëjnë diferencime gjatë dhënies së dënimit ndërmjet vendasve dhe të huajve. Kështu për të njëjtën vepër penale një i huaj dënohet më shumë se një vendas. Raportit të Këshillit të Europës nuk i ka shpëtuar as Kisha Ortodokse Greke. “KE tërheq vëmendjen në përgjegjësinë që ka Kisha Ortodokse greke që të ushqejë tolerancën dhe sidomos respektin ndërmjet besimtarëve të saj”. Gjithashtu raporti thekson se grupe të ndryshme fetare nuk kanë mundësi të ushtrojnë besimin e tyre, pasi nuk ekzistojnë objektet e kultit.