Skandal, drejtuesi i PS-së së Korçës falsifikonte pasaportat biometrike

Truri i grupit të falsifikimit të pasaportave biometrike për personat e inkriminuar ishte njeriu i afërt i Edi Ramës, profesori i Matematikës në Universitetin e Korçës, Sitki Mullai. Burimet e Policisë së Korçës bënë të ditur se, Mullai në bashkëpunim me të birin, Relsi Mullai, i cili punonte në kompaninë e prodhimit të pasaportave, "Aleat", dhe me ndihmën e dy bashkëpunëtorëve të tjerë, vidhnin gjeneralitetet e personave të paskeduar nga agjencitë e hetimit të krimeve të vendeve të BE-së, duke i tjetërsuar dhe pajisur me këto të dhëna, persona të tjerë me precedentë penalë në vendet e huaja. Për çdo falsifikim, ata siguronin një shumë nga 5 deri në 7 mijë euro. Profesori Sikti Mullai organizonte lidhjet mes klientëve me të dhëna kriminale dhe punonjësve të "Aleat". Për Policinë e Korçës përfshirja e profesorit të Matematikës në këtë rrjet kriminal ishte surprizë, pasi ai ishte i panjohur nga forcat e rendit të qytetit juglindor, pasi nuk kishte precedentë penalë. Por, profesori është një figurë e njohur politike, pasi ai ishte mes grevisteve të urisë të Partisë Socialiste, të ngujuar në çadrat e ngritura në Bulevardin "Dëshmorët e kombit", në maj të vitit 2010. Një ndër 220 heronjtë, siç i etiketoi kryetari i Partisë Socialiste, Edi Rama. Pamjet televizive e tregonin atë shpeshherë në krah të liderit socialist, madje edhe duke mbajtur fjalime apo duke dhënë intervista për mediat. Madje, ai u bë i njohur mediatikisht edhe për faktin, se disa gazeta të përditshme aluduan me faktin se si njëkohësisht profesori mundi të ishte edhe në grevën e urisë, edhe duke dhënë mësim në Universitetin e Korçës.

Sipas policisë, veprimtaria kriminale e grupit të drejtuar prej tij, ka nisur përpara se ai të rreshtohej në krah të Edi Ramës, në grevën e urisë dhe ka vijuar gjatë grevës dhe pas saj. Por, pjesëmarrja e elementëve me tendenca dhe precedencë kriminale në aksionet politike të Partisë Socialiste nuk përbën risi tashmë, siç u vërtetua edhe në dhunën ndaj institucioneve kushtetuese, më 21 janar, ku mjaft nga ata që sulmuan forcat e policisë, rezultuan me precedentë të rrezikshëm kriminalë.

Shtetasit Artur Feto, 31 vjeç, lindur dhe banues në fshatin Fitore-Devoll, Relsi Mullai, 27 vjeç, lindur dhe banues në Korçë me detyrë specialist IT-je pranë firmës "Aleat", Armand Cenolli, 21 vjeç, lindur dhe banues në fshatin Vashtëmi, Korçë me detyrë operator aplikimi pranë kompanisë "Aleat" në Komunën e Libonikut-Korçë, dhe Setki Mullai 56 vjeç, lindur dhe banues në Korçë me detyrë Pedagog në Universitetin "Fan. S. Noli" Korçë, u arrestuan para tre ditësh gjatë operacionit "Specialisti". Operacioni është realizuar pas një pune intensive 3-mujore, ku janë aplikuar metodat speciale të hetimit, nga ku janë mbledhur prova të mjaftueshme për veprat penale të "Falsifikimit të letërnjoftimeve, pasaportave ose vizave", "Ndihma për kalim të paligjshëm të kufirit" dhe "Ushtrim i ndikimit të paligjshëm ndaj personave që ushtrojnë funksione publike".