Lulzim Basha jep dorëheqjen nga detyra e ministrit të Brendshëm- i shpall zyrtarisht sfidë Edi Ramës për Bashkinë e Tiranës

Ministri Basha i ka paraqitur sot Kryeministrit Berisha dhe kryetares së Kuvendit dorëheqjen e tij nga detyra dhe mandati i deputetit

- Mazhoranca ka zyrtarisht Lulzim Bashën kandidat për Bashkinë e Tiranës. Ministri i Brendshëm ka dhënë sot dorëheqjen nga posti i tij ministror dhe mandati i deputetit, përmes një letre drejtuar kryeministrit Sali Berisha dhe kryetares së Kuvendit, Jozefina Topalli. Zyra e shtypit e Ministrisë së Brendshme njoftoi vendimin e Bashës, i cili nga dita e sotme merr një tjetër përgjegjësi, atë të konkurrentit elektoral për bashkinë më të madhe në vend. “Z. Lulzim Basha i ka paraqitur sot Kryeministrit të Shqipërisë Z. Sali Berisha dorëheqjen nga detyra e Ministrit të Brendshëm. Po sot, zoti Basha, në një letër dërguar Kryetares së Kuvendit të Shqipërisë Znj. Jozefina Topalli, ka dhënë dorëheqjen nga mandati i deputetit të Kuvendit të Shqipërisë”- thuhet në njoftimin e zyrës së shtypit të Ministrisë së Brendshme. Tashmë, zoti Basha do të marrë një tjetër angazhim, një tjetër sfidë, e cila parashikohet po aq e suksesshme sa detyrat e mëparshme të tij si, në anëtarësimin e Shqipërisë në NATO, ndërtimin e rrugës së kombit “Durrës-Kukës Morinë” dhe së fundmi vendimi i Brukselit për liberalizimin e vizave Shqipëri-BE. Përgjegjësia e zotit Basha është t’i kthejë qytetarëve qytetin e Tiranës. Zyrtarisht, ai i ka shpallur sfidë Edi Ramës, kryetarit në ikje të Bashkisë