Sido të luaj me opinionin Edvin Rama, sërish humbjen e ka të sigurtë..

Për tu dukur interesant, Edi Rama e la për në çastet e fundit shpalljen e kandidaturës për kryebashkiak. Është metodë e njohur dhe bajate kjo për tu bërë në sy të njerëzve interesant, misterioz, i papritur dhe politikan që përbën lajm më vete për mediat. Do të mjaftonte vetëm ky stil sjellje me publikun për t’ia dhënë votën kundër. Por sido të luaj me opinionin, sërish humbjen e ka të sigurtë. E di, nuk i bën përshtypje sepse është mësuar me to.

Sepse çdo privilegj nuk e ka nga meritat e veta por nga biografia, familja dhe peshqeshi që i dhuroi Partia Socialiste duke e bërë ministër dhe kryebashkiak. Humbjet janë trofetë e tij të shumta. Të gjithë e kanë të qartë të kaluarën dhe të sotmen e tij. Janë jo një, por disa arsye ku shoh humbjen e këtij njeriu që tani.Së pari: Pas 11 vitesh në krye të Bashkisë së Tiranës, rezultati është rrënqethës. Shkatërrim, beton dhe një kryeqytet krejtësisht kaotik. Gënjeshtra pafund, projekte gjoja gjelbëruese, ekrane tridimensionale dhe lojra oratorie apo gjoja thjeshtësie në emër përtej së majtës dhe së djathtës. Askush nuk ia fal dëmin që i solli këtij qyteti ky njeri megaloman dhe i papërgjegjshëm. Kur e shoh si interpreton para kamerave, më vjen për të qeshur. Por edhe më vjen keq se më zhgënjeu thellë në besimin për të na rregulluar Tiranën dhe patur një opozitë dinjitoze, shtytëse dhe jo penguese.
Së dyti: Si kryetar i PS-së u bë makth i të gjithëve. Ndoshta është në genin e tij të mos prodhojë gëzime, veç hidhërime. Ka njerëz me destina negative që do të ishte tmerr ta kishe fqinj, e jo më ti jepje votën për të drejtuar fatet e vendit. Edi Rama është më i spikaturi i tyre. Duket se ka qejf të torturojë njerëzit, t’i tërheqë zvarrë, t’i mundojë, poshtërojë. Njëkohësisht luan rolin e një tipi modern dhe interesant. Kur të largohet nga Bashkia dhe Partia Socialiste, do të mësoni çudira në sjellje, fjalor dhe marrëdhënie me vartësit e tij administrativ dhe politik. Sikur vetëm për këtë kureshtje dhe për të mësuar rreth bëmave të tij, ia vlen për të votuar kundra këtij njeriu. Vitet që pasuan me atë në krye të PS-së, janë vitet më të errëta për këtë parti. Fshiu çdo personalitet të saj dhe askush nuk guxon të prononcohet në media pa lejen e tij. Edhe ai që ka ndërmarrë një hap të tillë është shpallur armik. Ky është Edi Rama modern, që veç potureve asgjë nuk ka ndryshe nga e gjithë klasa politike. Madje, më keq se të tjerët. E ktheu partinë jo në një dritë shprese, besimi dhe optimizmi, por në një njesit gueril me aksione revolucionare që nga nihilizmi, grevat e urisë e deri në dhunë e flakë për të rrëzuar një qeveri të ligjshme.
Së treti: Gjysma e së majtës është sot me Ilir Metën. Me gjithë dëshirën e Ramës për ta nxjerrë nga skena politike këtë forcë me anë të ndryshimeve në kodin zgjedhor, sërish ajo është një faktor shumë i rëndësishëm. Aq më tepër që tani në koalicion me PD-në nuk ka gjasa që votat e saj të vidhen e firojnë me urdhër të Edi Ramës. Vetëm këto zgjedhje do të tregojnë se kush është në të vërtetë LSI-ja dhe Ilir Meta.
Së katërti: Edi Rama e di mirë se sa është numri i atyre brenda PS-së që nuk e shikojnë dot me sy e mezi presin humbjen e tij. Këto janë vota kundra tij dhe pro koalicionit qeverisës. Vetëm një i verbër nuk e pranon që Ramën, së pari nuk e duan brenda PS-së. Të deklaruar ose jo, ata bëhen mijëra, me miq e shokë, me familje e farefis që janë tulla të hequra nga ndërtesa e Ramës. Ata e duan Partinë Socialiste, prandaj do të votojnë kundra Ramës. Kundra atij që vetëm politikan nuk mund të bëhet kurrsesi. Politikan që prodhon armiq në të katër anët, edhe brenda partisë së vet. Prisni këto zgjedhje dhe të shikoni zemërimin e padurimin e tyre kundra atij që kërkon nga mediat t’i përdorin epitetin “lider” dhe jo kryetar i PS-së!
Së pesti: Sepse ka vendosur të bëjë fushatë politike dhe jo alternative për kryeqytetin. Natyrisht, vetëm kjo i ka mbetur. Po të premtonte sërish gënjeshtra njerëzit do t’i kujtonin mosrelizimin e gënjeshtrave të vjetra tridimensionale. Duke sulmuar mazhorancën politikisht, i gënjen mendja se do të nxjerrë thërrime fitimi. Njerëzit shikojnë punën që ka bërë kjo mazhorancë që nga infrastruktura, NATO, liberalizimi i vizave, dhe jo të dëgjojnë dënglat e nihilistëve të sëmurë nga suksesi i të tjerëve. Dhe ata që shikojnë dhe arsyetojnë, bindjen e kthejnë në votë.
Së gjashti: Kandidati përballë tij është Lulzim Basha. Për fat të keq për Ramën dhe fatin e mirë të qytetarëve rivali i tij është një figurë e pastër nga skandalet shoqërore. U bënë vite që sejmenët e Edit e gjurmojnë për të nxjerrë kleçka personale dhe familjare nga ai. Edhe autorit të këtyre radhëve i janë servirur shpifje e mbroçkulla ndaj Lulzim Bashës. Ndërsa si ministër ka qenë nga njerëzit më të suksesshëm që kjo mazhorancë ka në radhët e veta. Basha është shtetari për të cilin një qeveri mund të krenohet. Po të rreshtojmë këtu edhe simpatinë e të majtëve për cilësitë profesionale dhe njerëzore të Lulzim Bashës, bindemi se Tirana më në fund do të ketë një kryebashkiak normal, punëtor dhe të ndershëm.
Këto gjashtë arsye janë një pjesë ku humbja e Ramës shikohet me optimizëm që sot. Nëse do i kujtojmë atij edhe përbuzjen e komunitietit të artistëve kryeqytetas për fyerjet si çingijet e oborrit, komunitetit musliman për talljet me ndërtimin e xhamive, tiranasve autoktonë që u ka ardhur në majë të hundës dhe qindra të tjerëve që në fillim e besuan e më pas e ndjenë veten të poshtëruar prej tij, kontigjenti që do ta votojnë kundra është shumë, shumë i madh. Nëse ambasadat e akredituara në Tiranë do të kishin të drejtë të votonin si ne, me siguri do ta ndjenin veten të lumtur po të largonin këtë kryebashkiak dhe politikan.
Humbja e Ramës i gëzon të gjithë. Është e vetmja humbje ku dalin të fituar Shqipëria, kryeqytetasit, PS-ja, artistët, feja, autoktonët, ambasadat, komuniteti europian, Amerika dhe Internacionalja Socialiste. E dini pse do të vijnë aq vëzhgues nga Amerika dhe Europa për zgjedhjet e 8 majit? Sepse duan ta prekin vetë me dorë gëzimin e humbjes së Edi Ramës. Gjithkush kërkon të krenohet që ka qenë i pranishëm në Shqipëri kur këtë destruktivitet monstruoz me emrin Edi Rama, populli e largoi nga skena politike që kur ishte në opozitë. Mos bëjmë gjoja sikur nuk e kuptojmë. Ai është kthyer në bezdi edhe për komunitetin europian që ka projekte integrimi për Shqipërinë. Paradoksale, por e vërtetë dhe e nevojshme. Të humbësh një votë pro Ramës, është si të votosh me dëshirë kundra vetes, fëmijëve dhe vendit tënd. Ai tashmë na e ka bërë të qartë moton e tij jetësore, politike dhe kryebashkiake. Më votoni edhe pse ju urrej dhe ju përbuz! 8 maji do t’i japë një përgjigje filozofike. Por jo mësim. Sepse nga dështimet kurrë nuk ka mësuar.