Edi Rama nuk e fsheh dot ankthin përpara zgjedhjeve lokale”

“Edi Rama nuk e fsheh dot ankthin që ka përpara zgjedhjeve lokale, në mungesë të plotë të bilanceve dhe alternativave që ai u ka premtuar qytetarëve”.
Partia Demokratike ka reaguar ndaj denoncimit që bëri në Prokurori Partia Socialiste ndaj kandidatit të Partisë Demokratike, Lulzim Bashës, në zgjedhjet vendore të 8 majit. “Partia Demokratike e konsideron denoncimin që bëri dje Partia Socialiste në Prokurori ndaj Lulzim Bashës, si një vijim të politikës së vjetër të krijimit dhe ushqimit të konfliktit dhe përdorimit të viktimave njerëzore për marketing dhe fushatë. Në këtë njoftim për mediat, të shpërndarë nga zyra e shtypit e PD-së, thuhet se fryma e vjetër e urrejtjes së kryetarit akual të bashkisë së Tiranës njëkohësisht kreut të opozitës Edvin Kristaq Ramës nuk sjell asgjë të re në ato që kërkojnë shqiptarët, nuk shton hapësirat publike, nuk shton parqet, nuk shton vendet e reja të punës, nuk shton oksigjen në këtë ambient të ndotur, nuk shton gjelbërim mbi beton, dhe nuk përmirëson asgjë në cilësinë e jetës së shqiptarëve. Përplasjet politike i kanë lodhur tashmë qytetarët dhe ato nuk shtojnë asgjë në mirëqenien e tyre. Vazhdimi i kursit të vjetër të konfliktit dhe përplasjes është në fakt e vetmja alternativë që Edi Rama ofron në prag të zgjedhjeve lokale të 8 majit”, thuhet në këtë njoftim për mediat të shpërndarë nga zyra e shtypit e PD-së.