Greqia nis rregjistrimin e pronave reagojnë çamët

Ligji i ri për regjistrimin e tokave shkakton kaos mes pronarëve në Greqi

Regjistrimi i ri i tokave ka shkaktuar kaos në zyrat e regjistrimit në shtetin helen. Shumë pronarë tokash kanë pritur në radhë për më shumë se shtatë orë për të regjistruar pronën e tyre. Ligji i ri parashikon që pronarët rezidentë të regjistrojnë shtëpitë dhe apartamentet e tyre deri më 30 shtator të këtij viti, ndërsa pronarët e huaj deri më 30 dhjetor të këtij viti.

Kaosi

Sipas medieve të huaja, këto procedura burokratike kanë krijuar kaos dhe zemërim për mijëra pronarë tokash, por edhe për vetë punonjësit e administratës, të cilëve u është caktuar të menaxhojnë procesin e aplikimeve. “Është një kaos absolut. Njerëzit këtu po shtypen me njëri-tjetrin”, - është shprehur një punonjës zyre në Athinë, ku janë hapur vetëm 4 zyra regjistrimi për më shumë se 4 milionë prona. Rezidentët e huaj në Greqi kanë qenë po kaq të zemëruar. "Nuk më besohet, kemi pritur më shumë se gjashtë orë në këto temperatura të larta për të regjistruar një apartament të vogël pushimesh dhe ne duhet të paguajmë 70 euro taksë”, - është shprehur një qytetare gjermane, Marianne Jordan për “Deutsche Presse-Agentur”. “Kam përshtypjen se nuk jetojmë në një shtet të Komunitetit Evropian, por në Perandorinë Otomane”, - komentoi një rezident i moshuar grek.

Greqia dhe Shqipëria pa regjistër tokash

Greqia dhe Shqipëria janë të vetmet shtete në Evropë që nuk kanë një regjistër të tokave. Bashkimi Evropian ka ushtruar presion mbi Athinën zyrtare prej vitesh që ajo të përfundojë këtë regjistër. Ligji i ri vjen pas më shumë se 178 vjetësh që nga koha kur Greqia ka shpallur pavarësinë. Sipas informacionit zyrtar, grekët që jetojnë jashtë shtetit e kanë të detyrueshme të regjistrojnë pronat e tyre. Zyrat greke të kadastrës janë të shpërndara në 107 zona të reja të prefekturës së Athinës, Selanikut dhe qyteteve të tjera të Greqisë, të cilat nuk janë përfshirë në kadastrën e shtetit në projektet e mëparshme.

Procedurat

Kadastra greke në më pak se 4 vjet ka regjistruar 3.1 milionë ha tokë dhe 6.7 milionë tituj pronësie pritet të regjistrohen. Pasi të përfundojë projekti, në të cilin parashikohet të marrin pjesë 3 milionë qytetarë, kadastra greke do të mbulojë 2/3 e popullsisë së vendit. Qytetarët që kanë një titull pronësie në këto zona duhet t’i regjistrojnë në kadastrën greke nga data 17 qershor deri më 30 shtator 2008, ndërsa qytetarët grekë që jetojnë jashtë shtetit si dhe rezidentët e huaj mund t’i regjistrojnë deri më 30 dhjetor të 2008-s. Për emigrantët informacioni që ata mund të kërkojnë do të mundësohet me anën e bashkëpunimit që institucionet kanë me “World Council of Hellenes Abroad (SAE)”, zyrat e komunikimit dhe të shtypit në ambasadat greke. Qytetarët grekë që jetojnë jashtë mund të marrin informacion në numrin e telefonit 0030 210 6505600 ose në adresën “288 Mesogheion Ave, 15562, Athinë”. Të interesuarit që jetojnë jashtë shtetit kanë një mundësi për të marrë informacion duke vizituar faqen online të zyrave të kadastrës greke, e cila, sipas informacionit zyrtar, do të jetë e rifreskuar herë pas here me informacione të reja. Edhe me anën e medieve që transmetojnë në satelit, kadastra greke do të ofrojë informacion të vazhdueshëm. Gazeta “Metropol” do të botojë nesër procedurat dhe mënyrën e aplikimit për qytetarët e interesuar si dhe dokumentacionin që duhet të plotësojnë.

Reagim i Partisë për Drejtësi dhe Integrim

“Pronat e Çamërisë, duhet t’u njihen çamëve”

Si do të veprohet me pronat e Çamërisë apo tapitë që zotërojnë çamët? Kjo është pyetja e kahershme që nuk ka gjetur zgjidhje. Në lidhje me artikujt e shtypit të huaj ka reaguar dje Partia për Drejtësi dhe Integrim. Në një prononcim për gazetën “Metropol” zoti Tahir Muhedini, kryetar i Partisë për Drejtësi dhe Integrim, është shprehur se duhet të njihen edhe pronat e shqiptarëve të Çamërisë, një e drejtë që shteti grek duhet ta plotësojë. Por një tjetër problem që ngrenë drejtues të kësaj partie është fakti se shteti grek nuk jep viza për qytetarët shqiptarë. Kjo është një tjetër padrejtësi, pasi ky proces nuk mund të realizohet nëse këta qytetarë nuk mund të hyjnë në territorin grek. “Shteti grek është shtet anëtar në Bashkimin Evropian. Prona është e patjetërsueshme. Të drejtat e njeriut dhe të pronës shteti grek duhet t’i plotësojë më mirë se çdo vend tjetër, pasi bën pjesë në BE. Shqiptarët e Çamërisë janë autoktonë dhe janë larguar përmes gjenocidit dhe spastrimit etnik. Pronat janë të tyret dhe duhet të njihen. Në një kohë që shteti shqiptar minoritetin grek në Shqipëri pa pasur prona e ka bërë me prona, minoritetin grek pa pasur nënshtetësi greke i ka dhënë dyshtetësinë, në një kohë që shqiptarët e Çamërisë kanë pasur shtetësi greke dhe kombësi shqiptare dhe në bazë të të gjitha akteve ndërkombëtare u takon ta mbajnë nënshtetësinë greke, jo se kanë qejf të bëhen grekë, porse i takon. Me një fjalë, këtu kemi të bëjmë me dy standarde. Shqiptarët e Çamërisë i kanë tapitë e pronave dhe pyetja është se çfarë do të bëhet me këto tapi”, - ka theksuar zoti Muhedini.