Sekuestro pallatit të Delijorgjit, verifikohen 100 milionë euro pasuri

Sekuestro pallatit të Delijorgjit, verifikohen 100 milionë euro pasuri

Gati procedurat për të hetuar edhe për implikim të mundshëm në pastrimin e parave

Aksioni i nisur për bllokimin e pasurive të dy të akuzuarve si përgjegjës për tragjedinë e Gërdecit, ka vijuar përgjatë ditës së djeshme, ku në fokus kanë qenë pronat e shumta të Mihal Delijorgjit. Presidenti i firmës “Alb-Demil” duket se do të hetohet tashmë në një rreth më të hapur, ku përfshihen edhe anëtarë të tjerë me lidhje farefisnore apo shoqërore, në pronësi të të cilëve rezulton gjithashtu një pasuri marramendëse.

Ende ekspertët nuk kanë llogaritur ndonjë shumë ekzakte të pasurisë që do të bllokohet, por burimet e rezervuara nga Policia e Shtetit konfirmuan se bëhet fjalë për të paktën 100 milionë euro, ku shumica e të cilave janë investuar në ndërtime të tjerat përbëjnë aktivitete të ndryshme private. Po verifikohen edhe procedurat e transfertave bankare si dhe vërtetësia e kontratave.

Një pasuri kaq marramendëse i ka detyruar ekspertët e policisë e Prokurorisë të parashikojnë pika të mundshme, ku Delijorgji të hetohet edhe për ndonjë implikim të mundshëm në pastrimin e parave.

Problemi i vetëm qëndron te ndërmarrja e një procedimi të tillë, qëndron në faktin se personit që i bëhet kjo akuzë i duhet provuar fakti që është përfshirë në rrjete të organizuara, kriminale dhe mbarimi i hetimeve nga Prokuroria, ku trafiku i armëve duket se po predominon në pistat e para, do të përbëjë kështu edhe shtysën ku t’i lihet hapësirë ligjore këtij procedimi.

Pronat e Delijorgjit

Ditën e djeshme specialistët e policisë e Prokurorisë kanë shkuar në “Rrugën e Kavajës”, ku është verifikuar pallati i ndodhur në këtë rrugë, për të cilat burimet policore thanë se është në pronësi të Mihal Delijorgjit. Pallatet janë disa nga pronat më me vlerë të tij, ndërsa numërohen edhe dhjetëra biznese në pronësi të tij dhe të të afërmve.

Mes aktiviteteve të tij përmendet fabrika e Shkozetit në Durrës, në të cilën prodhoheshin zgara, rrjeta metalike, llamarinave etj, ku ngriti edhe firmën e tij, "Përparimi".

Përveç biznesit të tij për tregtinë e hekurit, Delijorgji ka investuar edhe në sport.

Që prej vitit 2006, Mihal Delijorgji zotëron edhe firmën "Alba-Demil" që kryente çmontimin e municioneve në fshatin Gërdec. Në periudhën 2006-2007 përveç bizneseve të tij, ai i rikthehet investimeve në fushën e futbollit, por këtë herë si President i sport klub Luftëtarit (Gjirokastër), rreth ky i origjinës së tij.

“Trashëgimitë” e Pinarit

Ylli Pinari, drejtor i kompanisë shtetërore të Ministrisë së Mbrojtjes MEICO, në 2004-n ka pasur në pronësi 17 apartamente banimi.

Trashëgimia e lënë nga babai dhe nëna e Pinarit, janë truaj në masën 2455 metër katror, që gjenden në lagjet e Tiranës si “Ali Bej” dhe “Ali Pashë Gucia”, secilën prej këtyre i zotëron në masën 25 për qind. Po kështu, ai është pronar i një toke bujqësore prej 22 hektarësh, që gjenden në fshatrat Fortuzaj dhe Babrru, që të gjitha trashëgimi nga babai dhe nëna.

Nga 12 hektarët që gjenden në Fortuzaj, ai është pronar i 6000 metra katrorë, ndërsa nga 10 hektarët që gjenden në Babrru, ai është pronar i 4000 metrave katrorë.

Nga të ardhurat personale, Pinari shkruan se ka blerë 2 autovetura, një të markës “Skoda”, me vlerë 1 milion lekë dhe një të markës “Volksvagen”, me vlerë 250 mijë lekë.

Shfajëson veten dhe hedh baltë mbi “MEICO”-n

Ish- ministri Mediu rrëfehet në Prokurori

Në kuadër të hetimeve për ngjarjen e Gërdecit prokurorët e grupit hetimor të kësaj çështjeje kanë marrë në pyetje ditën e djeshme ish-ministrin e Mbrojtjes, Fatmir Mediun, i cili deklaroi si person që ka dijeni për ngjarjen e Gërdecit.

Burime pranë organit të akuzës shqiptare shprehen se në deklarimin e tij Mediu ka pohuar se nuk ka pasur dijeni për fabrikën që solli fatkeqësinë.

Ajo që ka theksuar Mediu para grupit hetimor, është se ministria që ai drejtonte kishte si kompetencë ligjore vetëm transportimin e arkave me municione dhe jo çmontimin e tyre.

Veç të tjerash ekspertët hetimorë sekuestruan edhe një sërë aktesh që lidhen me procedurat e ndjekura në Ministrinë e Mbrojtjes për çështjen në fjalë.

Aktualisht nga organi i akuzës janë marrë në pyetje persona të Ministrisë së Mbrojtjes e Shtabit të Përgjithshëm, të cilët mendohet se kanë dijeni për çështjen. Ndërkohë që po verifikohen pasuritë e administratorit të firmës “Alba-Demil”, Mihal Delijorgji.