Rikthehet beteja PS-LSI, rivaliteti me pjesëmarrjen e qytetarëve në marshimin për tragjedinë e Gërde

Rikthehet beteja PS-LSI, rivaliteti me pjesëmarrjen e qytetarëve në marshimin për tragjedinë e Gërde
Nga L. Progni
Një javë pas tragjedisë së Gërdecit kthehet beteja e fortë ndërmjet dy partive të majta, PS e LSI. Pjesëmarrja masive e qytetarëve të Tiranës në marshimin e heshtur të dy ditëve më parë, i organizuar nga opozita në nderim të viktimave të Gërdecit, komentohet nga Sekretari i Përgjithshëm i LSI si sukses i kësaj partie. I pyetur për marrëdhëniet PS-LSI pas daljes bashkë në marshimin e heshtur, Vasili la të kuptohet se nuk ka asnjë përparim pozitiv në këto marrëdhënie, madje pjesëmarrja masive ishte reagim i qytetarëve të Tiranës ndaj thirrjes që LSI bëri për dorëheqje të Berishës si shkaktari kryesor për ngjarjen e Gërdecit. “Reagimi i djeshëm ishte mbështetja masive e mijëra e mijëra njerëzve ndaj kërkesës sonë për dorëheqjen e menjëhershme të kryeministrit Berisha, që po prodhon tragjedi dhe që po e shpërdoron pushtetin në mënyrë të frikshme, duke marrë edhe jetë njerëzish”, - tha Vasili.

Për të njëjtën çështje, kryetari i PS, Edi Rama, u shpreh menjëherë pas “Marshimit të heshtur”, mbrëmjen e dy ditëve më parë, se pjesëmarrja masive në këtë marshim në nderim të viktimave të Gërdecit, është një protestë qytetare dhe jo politike. “Jam këtu për t’u përulur me respekt përpara atyre dhjetëra-mijëra qytetarëve dhe qytetareve, që pak më parë dëshmuan në bulevardin “Dëshmorët e Kombit”, dinjitetin e një qytetarie të re, e një vetëdijeje të re, e një solidariteti të ri, duke manifestuar në heshtje dhimbjen dhe indinjatën e miliona e miliona shqiptareve e shqiptarëve për tragjedinë e tmerrshme të Gërdecit. Për humbjen e jetëve të pafajshme të fëmijëve, grave, burrave, që për bukën e gojës jetonin çdo ditë mbi predha, për shkatërrimin e 500 shtëpive të ndërtuara me sakrificat e papërfytyrueshme të atyre familjeve, që përgjithësisht kishin zbritur pranë kryeqytetit për një jetë me të mirë, për dëmtimin e atyre mijërave banesave, ku familje të tëra mezi nxjerrin muajin dhe nuk arrijnë dot të festojnë ditëlindjet e fëmijëve të tyre.

I falënderoj të gjithë për pjesëmarrjen në një manifestim unikal të solidaritetit njerëzor, qytetar, përtej kufijve partiakë, përtej të majtës dhe të djathtës, përtej kapitullit të rëndë të një tranzicioni, që na ka ndarë, përçarë e sunduar me mure të trashë paragjykimesh dhe që kulmoi me shpërthimin vrastar të korrupsionit në Gërdec”, - tha Rama.




PS-LSI, vazhdon acarimi pas tragjedisë së Gërdecit




Mbrëmjen e dy ditëve më parë, kur përfundoi marshimi në bulevardin “Dëshmorët e Kombit”, krerët e partive të opozitës, pjesëmarrës në këtë marshim, qëndruan në një kafene në qendër të Tiranës, duke dhënë idenë e një opozite të bashkuar. Por burimet pranë takimit thanë dje, se nuk ka patur asnjë shkëndijë të një pajtimi ndërmjet PS dhe LSI, madje, krerët e dy partive në këtë takim, Rama e Meta, nuk kanë shfaqur asnjë shenjë të kthimit të normalitetit në marrëdhëniet ndërmjet dy partive.

I pyetur drejtpërdrejt për takimin e krerëve të PS e LSI për protestat dhe për faktin nëse ky takim ka sjellë një situatë të re pozitive në këto marrëdhënie, Sekretari i Përgjithshëm i LSI, Petrit Vasili, tha: “Për LSI ka vetëm një qëndrim njerëzor, qytetar dhe një shprehje të jashtëzakonshme si asnjëherë tjetër në historinë e këtij vendi, një reflektim të thellë për një tragjedi të paprecedent. Mendoj se LSI dhe opozita dje kanë ofruar për publikun shqiptar dimensionin e munguar të një reagimi si qytetarë evropianë, të cilët nga ana e tyre janë entuziastë për të hyrë në Evropë, përkundrejt një mazhorance që vazhdon të jetë arrogante, mospërfillëse dhe reminishente në raport edhe me reagimin e saj të dikurshëm për publikun e gjerë dhe institucionet shqiptare, të cilat nuk ka hezituar t’i djegë, t’i dhunojë dhe t’i shkatërrojë”.




Deklarata




Sekretari i Përgjithshëm i LSI rikonfirmoi dje qëndrimin e partisë së tij për dorëheqjen e kryeministrit Berisha si fajtori kryesor i tragjedisë së Gërdecit, duke i shtuar këtij qëndrimi edhe kërkesën për dorëheqje të ministrit të Financave, ministrit të Punës dhe Çështjeve Socialiste, si dhe të ministrit të Brendshëm. Kërkesa për dorëheqjen e kryeministrit dhe tre ministrave të tjerë, pas dorëheqjes së ministrit të Mbrojtjes, konsiderohet e domosdoshme nga LSI, pasi, sipas krerëve të kësaj partie, këto janë dikastere të shtetit, të cilat mbajnë përgjegjësi direkte për tragjedinë e Gërdecit dhe kjo çështje, sipas tyre, nuk mund të mbyllet vetëm me dorëheqjen e ministrit të Mbrojtjes. “Ngjarja e Gërdecit tregoi qartë, se shumë ministri të rëndësishme nuk kanë funksionuar dhe si rrjedhim i kësaj edhe pasojat e prodhuara kanë qenë tepër të rënda. Ministria e Financave nuk ka ushtruar asnjë nga kompetencat e saj të detyruara me ligj, duke mos mbledhur as edhe tatimet dhe sigurimet shoqërore që lidheshin me këtë biznes ekonomik, që zhvillohej atje shumë pranë Tiranës, duke lejuar haptas një abuzivizëm dhe evazion fiskal korruptiv të pastër. Ndaj, duhet të japë dorëheqjen kryeministri dhe ministri i Financave.

Është skandaloz fakti që në këtë biznes shumë pranë Tiranës dhe me rrezikshmëri shumë të lartë, Ministria e Punës nuk ka ushtruar asnjë nga përgjegjësitë e saj lidhur me garantimin e kontrollit të sigurisë së kushteve të punës, si dhe ka lejuar punësimin e shfrytëzimin çnjerëzor të minorenëve, duke ligjëruar kështu një nga fenomenet antiligjore më të shëmtuara shtetërore dhe sociale.

Ndaj duhet të japë dorëheqjen kryeministri dhe ministri i Punës dhe Çështjeve Sociale.

Është absolutisht i patolerueshëm qëndrimi i Ministrisë së Brendshme lidhur me ankesat e vazhdueshme të kryetarit të Bashkisë së Vorës, lidhur me këtë fabrikë të vdekjes dhe indiferenca e papërgjegjshmëria e plotë e kësaj ministrie e ngarkon me përgjegjësi tepër të rëndë atë.

Ndaj duhet të japë dorëheqjen kryeministri dhe Ministri i Brendshëm. Është e qartë përgjegjësia e madhe dhe direkte e Ministrisë së Mbrojtjes për çdo moment të administrimit shtetëror të këtij procesi, duke shënuar kështu një papërgjegjshmëri dhe abuzivitet me detyrën shtetërore që prodhoi një ngjarje tragjike të paprecedent në historinë e Shqipërisë. Qeveria shqiptare dhe shumë ministri të saj kanë pushuar realisht së funksionuari dhe dorëheqja e ministrave që drejtojnë ministritë e Financave, të Ministrisë së Punës dhe Çështjeve Sociale dhe Ministrisë së Brendshme duhet të pasojnë veprimin e ministrit të Mbrojtjes, duke dhënë dorëheqjen e menjëhershme nga detyra”, - tha dje Vasili.