Pritet shkarkimi i Shefit të Shtabit Luan Hoxhës

Pritet shkarkimi i Shefit të Shtabit Luan Hoxhës
GJERGJI KOJA
21/03/2008 Pas analizës së ngjarjes së Gërdecit do të ketë ndryshime në drejtimin e Shtabit të Përgjithshëm të FA-së

Prokuroria pritet të thërrasë për të dëshmuar drejtues të FA-ve

Pas tragjedisë së ndodhur në Gërdec priten disa shkarkime në drejtimin e Shtabit të Përgjithshëm të Forcave të Armatosura, përfshi këtu edhe shefin e këtij shtabi, gjeneral lejtnant Luan Hoxha. Burime qeveritare shprehen për gazetën se masat pritet të merren pas analizës që do t’i bëhet situatës së ndodhur në Gërdec, ku përgjegjësia kryesore bie mbi drejtuesit e Shtabit të Përgjithshëm të FA-së. Ndërkohë, burime nga Prokuroria shprehen se në hetimet që kanë nisur për zbardhjen e tragjedisë do të thirren për të dëshmuar edhe drejtues të lartë të Ministrisë së Mbrojtjes dhe Shtabit të Përgjithshëm, që me informacionet që zotërojnë do të ndihmojnë në zbardhjen e ngjarjes. Gjithashtu, të njëjtat burime shprehen se do të hetohet nëse fadroma që punonte në këtë fabrikë ishte private apo mjet i ushtrisë. Burimet nga organi i akuzës shprehen se për zbardhjen e ngjarjes do të verifikohet zbatimi i ligjit nga Forcat e Armatosura, si dhe mënyrën sesi ka operuar Shtabi i Përgjithshëm i FA-së. Burimet shprehen se gjithashtu drejtues të FA-ve do të pyeten

se si është zbatuar vendimi qeveritar i vitit 2007 që ka të bëjë me çmontimin dhe çmilitarizimin e municioneve. Dëshmi në organin e akuzës, sipas burimeve, pritet të japin edhe drejtuesit e Drejtorisë së Logjistikës, që është drejtoria e katërt e Shtabit të Përgjithshëm të FA-së.

Kompetencat e Shtabit

Sipas të dhënave zyrtare, një nga kompetencat e Shtabit të Përgjithshëm të FA-së është organizimi dhe zhvillimi i inspektimeve dhe kontrolleve sipas një programi të miratuar nga Shefi i Shtabit të Përgjithshëm. Një tjetër kompetencë e Shtabit të Përgjithshëm është komunikimi me Komandat e Forcave, Komandat Mbështetëse dhe komandat e njësive të varësisë së drejtpërdrejtë, si komandë eprore duke ndjekur të gjitha procedurat ligjore të komunikimit zyrtar. Në bazë të të dhënave zyrtare, Shtabi i Përgjithshëm përgjigjet për përgatitjen e FA-ve në nivelin e detyrave që ushtron Kushtetuta e Republikës së Shqipërisë, Strategjia e Sigurimit, Politika e Mbrojtjes dhe Strategjia Ushtarake e Republikës së Shqipërisë. Gjithashtu, Shtabi i Përgjithshëm përmes Drejtorisë së Logjistikës përgjigjet edhe për sektorin e armatim-municionit, sektorin e transportit, sektorin e investimeve dhe infrastrukturës. Gjithashtu Shtabi i Përgjithshëm planifikon, administron dhe drejton furnizimin me armatim e municione njësitë e FA, si dhe planizon e drejton asgjësimin e municioneve dhe njohjen e situatës së tyre. Sikundër Shtabi i Përgjithshëm i FA-së ka përgjegjësi për monitorimin dhe kontrollin mbi municionet. Sipas burimeve, në ngjarjen e Gërdecit masat e ndërmarra nga Ministria e Mbrojtjes, dhe për të cilat duhej të përgjigjej Shtabi i Përgjithshëm, nuk kanë qenë ato që përcaktohen në ligj. Burimet shprehen se në të gjitha rastet në bazë të ligjit, FA-të jo vetëm që duhet të monitorojnë procesin dhe duhet të hartojnë planet e masave, por duhet të marrin në ruajtje edhe objektet ushtarake. Të njëjtat burime bëjnë të ditur se në rastin konkret gjithashtu nga ana e Shtabit të Përgjithshëm janë anashkaluar masat e sigurisë, ku me ligj përcaktohet inspektimi dhe kontrolli. Sipas burimeve nga Ministria e Mbrojtjes, në rastin e Gërdecit objekti ku kryhej demontimi i municioneve duhej të ruhej nga ushtria, sikundër duhet të ishin bërë kontrolle dhe inspektime mbi mënyrën se si kryhej procesi dhe cilët persona e kryenin atë. Të njëjtat burime shprehen se kur me ligj përcaktohet që edhe për fishekzjarrët licenca jepet nga komisionet e dhënies së licencës për punët me lëndë plasëse e shpërthyese që funksionon në Ministrinë e Mbrojtjes, për municione të tilla, nuk mund të bëhet fjalë që mos ketë inspektime dhe kontrolle.

Demontimi nën mbikëqyrjen dhe sigurinë e reparteve të FA-ve

Procesi i çmontimit të armëve dhe municioneve kryhet nën mbikëqyrjen dhe sigurinë ushtarake të reparteve të Forcave të Armatosura, duke regjistruar me hollësi të dhëna për regjimin, lëvizjen dhe sasinë e municioneve të dorëzuara dhe të atyre të çmontuara e të çmilitarizuara, si dhe të produkteve të tyre, pas çmontimit dhe çmilitarizimit nga ky proces. Ministri i Mbrojtjes, nëpërmjet një komisioni të posaçëm, përcakton kategorizimin e kontingjentit të armëve, teknikës, pajisjeve, municioneve dhe lëndëve eksplozive, të hequra nga armatimi e përdorimi, duke pasur parasysh kohën e prodhimit, gjendjen faktike të tyre, kërkesat e tregut dhe leverdinë ekonomike. Mënyra e funksionimit të komisionit përcaktohet me rregullore, e miratuar nga ministri i Mbrojtjes. Gjithashtu, në këtë vendim përcaktohet se Ministria e Mbrojtjes mund të asgjësojë e të shkatërrojë edhe nëpërmjet strukturave të veta armë, teknikë, pajisje, municione, lëndë eksplozive, të nxjerra nga armatimi dhe përdorimi, me fondet buxhetore, të vëna në dispozicion, si dhe me fonde të donatorëve.

Si shkarkohet Shefi i Shtabit të Përgjithshëm

Shkarkimi i Shefit të Shtabit të Përgjithshëm të Forcave të Armatosura është kompetencë e Presidentit të Republikës. Propozimin Presidentit të Republikës për shkarkimin dhe emërimin e Shefit të Shtabit të Përgjithshëm ia bën Kryeministri. “Presidenti i Republikës, me propozim të Kryeministrit, emëron dhe shkarkon Shefin e Shtabit të Përgjithshëm, si dhe me propozim të ministrit të Mbrojtjes, emëron dhe shkarkon komandantët e forcave tokësore, detare dhe ajrore”, përfshihet në kompetencat e Presidentit të Republikës, i cili është edhe Komandant i Përgjithshëm i FA-ve.

Mblidhet sot Këshilli Kombëtar i Sigurimit

Presidenti Bamir Topi do të mbledhë sot Këshillin Kombëtar të Sigurimit, i cili do të analizojë situatën e ndodhur në Gërdec. Burimet shprehen se në këtë mbledhje Presidenti Topi pritet të kërkojë informacione nga drejtuesit e Shtabit të Përgjithshëm, si dhe institucionet e sigurisë kombëtare mbi këtë tragjedi. Presidenti pritet të kërkojë llogari mbi masat që janë marrë nga Ministria e Mbrojtjes dhe Shtabi i Përgjithshëm i FA-ve për sa i takon aspektit të sigurisë qoftë të objekteve, ashtu edhe të procesit të demontimit të armëve. Gjithashtu, burimet shprehen se në këtë mbledhje pritet t’u kërkohet institucioneve përgjegjëse jo vetëm zbardhjen e ngjarjes brenda një kohe sa më të shkurtër, por edhe marrjen e masave ligjore për mospërsëritjen e një situate të tillë në të ardhmen.

Çfarë ka deklaruar Hoxha për Gërdecin?

Për tragjedinë e ndodhur në Gërdec publikisht Shefi i Shtabit të Përgjithshëm të FA-së shqiptare, gjeneral lejtnant, Luan Hoxha, nuk ka bërë asnjë koment apo deklaratë, përveç një prononcimi të dhënë në “Zërin e Amerikës”. Në këtë prononcim, Hoxha tha se aksidente të tilla si ai i ndodhur në Gërdec nuk mund të parashikohen. “Zonat ku janë municionet nuk kanë qenë zgjedhje ose dëshirë e dikujt për t’i vendosur. Ne jemi tashmë përpara fakteve dhe po bëjmë çmos që të ndërhyjmë me forca dhe mjete që të eliminojmë shumë nga këta rreziqe”, tha Hoxha. I pyetur nëse ka pasur programe konkrete për sigurinë e këtyre bazave, ai ka thënë se “nuk mund të them se aksidente të tilla parashikohen. Gjithsesi, bëhet një punë