Opozita braktis Kuvendin, si reagim të pamundësisë për të politizuar më tej tragjedinë e Gërdecit

Opozita braktis Kuvendin, si reagim të pamundësisë për të politizuar më tej tragjedinë e Gërdecit


Topalli: Funksionimi i shtetit nuk mund të ndalojë


Opozita ka braktisur dje seancën plenare të radhës, në përpjekje për të vijuar shfrytëzimin e mëtejshëm politik të tragjedisë së Gërdecit. Por, pavarësisht largimit të pakicës, Kuvendi miratoi me shumicë votash disa projektligje të rëndësishme, si dhe projekt-rezolutën, "Për vlerësimin e punës së Këshillit Kombëtar të Radio-Televizionit për vitin 2007'.

Gjatë debatit të lirë në seancë plenare, deputetët e opozitës vijuan me diskutimet për ngjarjen e 15 Marsit në Gërdec, ndërkohë që kërkuan vazhdimin e diskutimeve edhe pas kohës së përcaktuar në rregulloren e Kuvendit. Duke argumentuar se, koha e parashikuar për debate nga Konferenca e kryetarëve lidhur me ngjarjen e Gërdecit është ezauruar gjatë seancës së mbrëmshme plenare, Kryetarja e Kuvendit vijoi me rendin e ditës. Kjo solli edhe reagimin e deputetëve të opozitës, të cilët braktisën punimet e Parlamentit. Në vijim, Kuvendi miratoi projektligjin "Për disa shtesa dhe ndryshime në Ligjin: "Për mbrojtjen e mjedisit", të ndryshuar, si dhe projektligjin "Për një ndryshim në Ligjin: "Për përcaktimin e formës dhe të formulës së privatizimit të INSIG Sh.a.". Gjithashtu, në seancën e djeshme plenare u miratua edhe projektligji "Për ratifikimin e ndryshimit të marrëveshjes së rishitjes së aksioneve të INSIG-ut ndërmjet Ministrisë së Financave, që vepron në emër të shtetit shqiptar, Korporatës Financiare Ndërkombëtare (IFC) dhe Bankës Ndërkombëtare për Rindërtim dhe Zhvillim". Kuvendi shtyu miratimin e projektvendimit "Për një ndryshim në vendimin: "Për ngritjen e Komisionit të Posaçëm parlamentar për Reformën Zgjedhore". Për këtë qëndrim të opozitës, Topalli tha se, vijimi i seancës parlamentare sipas rendit të ditës është vendim i Konferencës së kryetarëve. "Në fakt është vendim i Konferencës që e keni marrë ju zotërinj, por ju nuk i qëndroni fjalës suaj dhe kjo nuk është normale", tha Topalli. Gjithashtu ajo shtoi se, shteti nuk duhet të ndalë së funksionuari, megjithëse ngjarja që ka ndodhur është shumë e rëndë. "Unë gjykoj se ngjarja që ka ndodhur është shumë e rëndë, por kjo nuk do të thotë që shteti të ndalet dhe të mos funksionojë asgjë, të mos miratohen ligjet, të mos funksionojnë ministritë. Ju keni qenë vetë ministra dhe kryeministra dhe e kuptoni sesa e rëndë është kjo që ju sillni sot", deklaroi Topalli. Më tej, ajo akuzoi deputetët e opozitës se kërkojnë që Parlamenti të mos funksionojë, por kjo nuk është e drejtë, pasi ajo që ka ndodhur kërkon që Parlamenti të funksionojë, duke ndryshuar edhe ligjet. "Ju doni që Parlamenti të mos funksionojë, por kjo nuk shkon. Parlamenti duhet të jetë më i gjallë dhe më funksionues se kurrë. Ajo çfarë ndodhi na ka bërë të gjithëve të mendojmë shumë, se çfarë duhet të ndryshojmë te ligjet, cilat janë ato ligje që na kanë sjellë këtu? Ku duhet të ndërhyjmë? Çfarë duhet të reformojmë?", i është drejtuar Topalli, deputetëve të opozitës.

Në përfundim ajo e ka quajtur kërkesën e opozitës si shmangie të përgjegjësive. "Ky, dhe jo ikja apo kërkesa për të mos funksionuar asgjë, është mungesë serioziteti dhe marrje e përgjegjësive", tha Topalli.

Edhe nënkryetari i Parlamentit, Fatos Beja, tha se duhen respektuar ligjet e vendit dhe se ka nevojë për aktivitet që të mos lejohet, rënia në kurthe, të cilat janë të papranueshme në një shoqëri demokratike. "Ky parlament ka një rregullore, ky shtet ka një Kushtetutë, ka ligje që funksionon, ne të zbatojmë procedurat që ka rregullorja. Vendi ka nevojë për ligje, ka nevojë për aktivitet dhe ne nuk mund të biem në kurthe dhe në leqe, të cilat janë absolutisht të papranueshme në një shoqëri demokratike", iu drejtua Beja, deputetëve të opozitës, të cilët braktisën sallën e Parlamentit.