Inspektorët e Edvin Rames, dëm 1.3 miliardë lekë

Performanca e dobët, shkaktimi i një borxhi tatimor prej rreth 1.3 miliardë lekësh si dhe nxitja e informalitetit ishin arsyet që çuan në lirimin nga puna të 51 inspektorëve të Tatim-Taksave në Bashkinë Tiranë. Drejtori i Përgjithshëm i Tatim Taksave në Bashkinë e Tiranës, Arben Kau sqaroi dje arsyet për largimin e inspektorëve të Tatim Taksave ndërsa rrëzoi të gjitha pretendimet mbi lirimin e tyre për arsye politike. Përmes një prononcimi për mediat, Kau theksoi se arsyet e shkarkimit janë performanca e dobët e realizimit të të ardhurave dhe lejimi i informalitetit. Moskryerja e detyrës nga inspektorët tatimorë i ka shkaktuar Bashkisë së Tiranës, sipas drejtorit Arben Kau, një borxh tatimor prej 1 miliard e 282 milionë lekësh. "Performanca e dobët e realizimit të të ardhurave, vetëm 55% në 7 muaj dhe me veprimet dhe mosveprimet e tyre kanë lejuar informalitet në shkallë të gjerë. Janë konstatuar gjatë muajit gusht 2011 afro 500 subjekte të paregjistruara, rreth 20 mijë metër katrorë hapësirë publike të evidentuara dhe të padeklaruara. Zënie të hapësirave për parkingje dhe është konstatuar që shumë subjekte nuk kanë kontratë me Bashkinë për zënien e këtyre hapësirave, duke krijuar një borxh tatimor prej 1 miliard e 282 milionë lekësh", tha Kau. Ndërsa theksoi se largimi i këtyre inspektorëve është bërë pas një analize të të gjithë sektorëve për punën e kryer në 7 muajt e parë të këtij viti. Nga kjo analizë, sipas Arben Kaut doli se të 51 inspektorët nuk kanë kryer detyrën e tyre funksionale. Drejtori i Përgjithshëm i Tatim Taksave e ka konsideruar absurd motivimin politik që i kanë bërë disa inspektorë largimit nga detyra. "Nuk mendoj se këta inspektorë kanë hyrë në punë në Bashki me teser partie, prandaj është absurd pretendimi i tyre. Ne jemi të vendosur që të mos tolerojmë asnjë abuzim me detyrën, shkelje të ligjit apo barazisë para ligjit nga punonjësit e Bashkisë së Tiranës", u shpreh Kau. E ndërsa inspektorët deklaruan se do t'i drejtohen Prokurorisë, Arben Kau u shpreh i hapur për t'u përballur me pretendimet e tyre në të gjitha institucionet e vendit, duke thënë se, "jemi të hapur të respektojmë të gjitha afatet siç i parashikon ligji për punonjësit, të cilët janë me kontratë pune në Bashki dhe në vazhdimësi po prapë e theksoj që jemi të hapur të përballemi me pretendimet e tyre në të gjitha institucionet e shtetit shqiptar".

Pas largimit, inspektorët deklarohen si kamikazë politikë të Ramës

Pas largimit nga puna të 51 inspektorëve, disa prej tyre kanë bërë të qartë se kanë qenë të thirrur në bashki për të qenë kamikazë politikë të Ramës dhe paksa në bazë të rregullave dhe principeve që kërkon administrata publike. Mjafton të lexosh reagimin e njërës prej këtyre punëtoreve për të kuptuar se largimi i saj nga puna ka qenë i vonuar. "Në administratën shtetërore nuk luhet si me votat e vjedhura nga regjimi. Këta shërbëtorë të regjimit, do kuptojnë se koha e frikës nga punonjësit e administratës dhe shpërdorimi i postit zyrtar për të bërë spastrime politike ka mbaruar njëherë e mirë! Koha e qytetarëve dhe fëmijëve të tyre nuk është tallja e radhës e Lulzim Bashës dhe hajnave të këtyre"është shprehur ajo. Mjafton të lexosh këto rreshta të këtij reagimi publik të saj për të kuptuar se administrata e bashkisë së Ramës nuk ka pasur asgjë të përbashkët me administratën publike dhe se është një stan i mbushur me militantë të pandreqshëm që nuk kanë vend në atë institucion. Dihet se Rama e përdori Bashkinë si një garazh ku parkoheshin militantët dhe rekrutët e tij. Një dëshmi e qartë e kësaj ishte edhe largimi në grup i drejtorëve të drejtorive në Bashki, të cilët ndonëse në dukje kishin status të nëpunësit civil, ishin thjesht kamikazë politikë të Ramës. Mjafton të lexoje deklaratën e tyre për të kuptuar se deri në çfarë pike kishte arritur degradimi i punonjësve të Bashkisë.