Çdo qytetar i Tiranës paguan 75 mijë lekë për gjelbërimin, 50 mijë lekë nga të cilat shkojnë në xhepat e kryebashkiakut

Rama, vjedhje skandaloze nga taksa e gjelbërimit

Ministri i Financave, Ridvan Bode, akuzoi dje Bashkinë e Tiranës për abuzime me taksat e qytetarëve. Sipas Bodes, Bashkia e kryeqytetit nën drejtimin e Edi Ramës po i përdor taksat e qytetarëve për të paguar punonjësit e këtij institucioni, ku pasi iu merr çdo banori 75 mijë lekë të vjetra në vit për taksën e gjelbërimit 50 mijë i kalon në rroga dhe vetëm 25 mijë në shërbime për ta. "Bashkitë duke filluar nga Tirana dhe çdo bashki tjetër taksojnë qytetarët me një tarifë për pastrimin që paguan çdo individ, paguan çdo biznes, paguan çdo kompani në shumë raste është rritur në mënyrë tepër abuzive nga ana e Bashkisë. Përse nuk pyesni në bashkitë tuaja sa është kostoja e përpunimit të mbetjeve urbane dhe pastrimit dhe sa është tarifa që arkëtohet nga qytetarët. Do të shikoni që të ardhurat që merren nga tarifa e pastrimit janë shumë më të larta nga shpenzimet që bën Bashkia për pastrimin dhe përpunimin e mbetjeve të ngurta. Meqë akuzoni qeverinë dhe unë po iu them që ky është një funksion tërësisht lokal dhe bashkiak. Shkoni pak në Bashkinë e Tiranës dhe shikoni që mesatarisht një banori të Tiranës i kushton paga 75 mijë lekë të vjetra në vit. Ndërkohë, që Bashkia e Tiranës investon për banorët e Tiranës vetëm 25 mijë lekë të vjetra në vit. Ndërkohë që në të gjitha shërbimet publike që bën Bashkia e Tiranës harxhon vetëm 35 mijë lekë të vjetra në vit. E shikoni që Bashkia e Tiranës pagat i ka të paktën 20% më të larta nga investimet dhe nga kostoja që përballon shërbimet publike", u shpreh Bode. Gjithashtu duke reaguar ndaj fjalës së deputetëve të opozitës të cilët akuzuan qeverinë se nuk po mbështeste pushtetin lokal, Bode tha se vetëm në vitin 2010 pushtetit lokal i janë akorduar 32 miliardë lekë, pa logaritur fondet nga qeverisja vendore, kur në vitin 2005 për pushtetin lokal janë akorduar 3 miliardë lekë. Ai akuzoi pushtetin lokal se fondet e dhëna nga qeveria, si dhe nga taksat e mbledhura i përdor për qëllime politike, duke rritur deri në 8 herë fondin e pagave. Ndërkohë ministri i Financave iu përgjgij edha akuzave të ngritura për qeverinë shqiptare për pabarazi sociale. Duke hedhur poshtë këto akuza Bode u ndal në rritjen e rrogave dhe pensioneve nga kjo qeveri. "Edhe pa dashur që të futem në thelbin e ligjit lidhur me fenomenet që u përmendën këtu dhe që ka të bëjë me ligjin që ne miratojmë sot, e para është çëshja e diferencave në paga dhe mënyrës së shpërndarjes së buxhetit në shtesat e ndryshme të punonjësve. Në fakt këtë nuk duhet ta kishe thënë zoti Braçe, sepse siç u thashë je futur në thekra dhe nuk del dot. Në vitin 2005 raporti i pagës së infermierit me pagën e Presidentit ishte 1 me 12. Në vitin 2010 është 1 me 6. Në vitin 2005 raporti i pagës së arsimtarit me Presidentin që është paga më e lartë ishte 1 me 10. Raporti i pagës sot të arsimtarit me Presidentin është 1 me 5. Raporti i pagës së mjekut me Presidentin ka qenë 1 me 10. Sot është 1 me 4. Këto janë 'pabarazitë' për të cilin fajin e ka Saliu. Ju të majtët që iu qan barku dhe derdhni lot krokodili për pabarazi sociale e çuat administratën në polarizimin më ekstrem që ka pasur ndonjëherë një vend demokratik dhe tashmë po u digjet barku pse janë raportet 1 me 4 e 1 me 5 kur kështu ekzistojnë në të gjitha vendet demokratike", u shpreh Bode.

300 mijë ton naftë në vit kontrabandohej nga PS

Ministri Bode u shpreh se, qeveria ka ecur me hapa gjigandë në luftën kundër evazionit fiskal, duke u ndalur tek tregu i karburanteve. "U rregullua tregu i naftës 'Virxhin' dhe nëse ju, në 2004-n arritët të zhdoganonit 230 mijë ton naftë importi, në 2010 janë zhdoganuar 480 mijë ton naftë. Bëhet fjalë për një rritje dy herë e gjysmë më shumë. Qeveria ka nxjerrë nga kanalet e kontrabandës 300 ton naftë", theksoi Bode. Nga ana tjetër ministri i Financave deklaroi se, "që në vitin 2006 qeveria ka përmirësuar ligjin për pjesëmarrjen e funksionarëve të lartë të administratës publike në borde". Duke reaguar ndaj akuzave të deputetëve të opozitës, se këshilltarë të Kryeministrit marrin pjesë në më shumë se dy-tre borde, Bode tha se, "në bazë të ligjit, asnjë nuk mund të jetë i angazhuar në më shumë se dy borde". Në këtë kuadër Bode u ndal edhe në demagogjinë e deputetëve socialistë për deklarimin e pasurisë ku i kujtoi deputetit Erjon Braçe dietat që ai ka marrë në këto 7 vjet. Sipas Bodes, Braçe merr 900 mijë lekë në muaj për shkuarjen në zonën e vet elektorale. Bode u ndal edhe në nivelin e taksave, ku sipas tij, "niveli i taksave mbi konsumin është më i vogël se ai i vendeve të OECD-së. Ngritët këtu problemin e taksave indirekte dhe taksave direkte dhe thoni se në Shqipëri 51% e taksave janë mbi konsumin, unë do t'iu ftoja nëse keni ekspertë në grupin tuaj, të futeni dhe të merrni statistikat që raportoj unë. Në SHBA 58% e taksave janë indirekte dhe 42% janë direkte. Në vendet e OECD 55% janë taksa indirekte dhe 45%. Në Shqipëri 49% janë taksa indirekte dhe 51% janë taksa direkte që vijnë nga biznesi. Edhe pse kemi ulur taksat direkte mbi biznesin ne vijojmë të mbetemi vendi, që kemi ende një raport jo afër OECD në strukturën e taksave që dëshmon dhe strukturën e ekonomisë sonë një pjesë e së cilës mbetet jashtë taksimit, siç është bujqësia", u shpreh ai. Ministri Bode bëri të ditur gjithashtu se qeveria ka përgjysmuar nivelin e taksave. Kreu i Financave publike reagoi edhe për evazionin fiskal, ndaj akuzës së ngritur nga deputeti Erion Braçe, i cili tha se, "evazioni fiskal buron nga tregu i brendshëm".