Shtohen përpjekjet e PS për të delegjitimuar 8 majin – Braçe e Gjoni, kamikazët e Edvinit për njësinë numër 3

Incident në minibashkinë nr 3, pas përpjekjet antiligjore të deputetëve socialistë Braçe e Gjoni për të marrë me forcë listat zgjedhore. Haset në rezistencën institucionale të kryetarit në detyrë, Ilir Kokona. Presidenti Topi deklaron se s’përzihet me zgjedhjet, por fton që ato të mos jenë politike

Dy deputetët socialistë Erjon Braçe dhe Ilir Gjoni janë përfshirë në një incident me kreun e minibashkisë numër 3 në Tiranë Ilir Kokona. Incidenti është provokuar nga deputetët edvinistë, të cilët kanë shkuar në minibashkinë numër 3 dhe kanë kërkuar konfiskimin e listave zgjedhore, edhe pse një të drejtë të tillë s’ua njeh ligji. Kjo kërkesë ka hasur në kundërshtimin institucional të kryetarit në detyrë të minibashkisë, Ilir Kokonës. Debati mes dy deputetëve dhe kreut të minibashkisë numër 3 Ilir Kokona për pak nuk ka degjeneruar në dhunë fizike, por kjo s’e ka shmangur zhurmën e porositur të mediave edviniste, të cilat janë vënë në shërbim të alibisë se zgjedhjet s’po i arrijnë standardet e se ato po manipulohen pikërisht nëpërmjet listave zgjedhore. Vlen të përmendet se për të plotësuar skenarin, bashkë me deputetët e PS-së para zyrave të Njësisë Bashkiake kanë qenë dhe disa dhjetëra qytetarët mbështetës së Partisë Socialiste.

Presidenti Topi lan duart nga zgjedhjet e 8 majit, por kërkon që ato të mos jenë politike

Presidenti i Republikës, Bamir Topi, ka bërë thirrje për një fushatë të qetë dhe korrekte ku të shpalosen vlerat dhe platformat më të mira për qytetarët, duke folur për zgjedhjet lokale. Kreu i shtetit ka vlerësuar rolin e pushtetit vendor duke theksuar se shpeshherë ka nënvlerësim nga qeveria qendrore. Topi ka kritikuar ndikimin e politikës e cila ka interferuar në disa kompetenca të pushtetit vendor duke bërë që projekte të caktuara të dështojnë. “Bëj apel në lidhje me zgjedhjet e datës 8 maj. Është momenti më i rëndësishëm që këto zgjedhje të zhvillohen në qetësi të plotë, pas një situate të tensionuar politike, gati në pozicionin e një konfliktualiteti të shprehur. Zgjedhjet duhet të zhvillohen në korrektësi sipas ligjit, ku pjesëmarrja e qytetarit duhet të jetë e madhe. U bëj apel qytetarëve të marrin pjesë në zgjedhje. Komunikimi zgjedhor nuk duhet të jetë negativist. Uroj që të dalin fitues njerëzit më të mirë. I bëj thirrje të gjithëve të bëjnë një fushatë profesionale”, deklaroi Topi. “Roli i qeverisjes vendore është i jashtëzakonshëm. Është ai pushtet që ne ndjejmë më afër. Ky pushtet, ndonëse vetë politika qendrore i ka dhënë mundësi të zhvillohet, në mjaft raste edhe nënvleftësohet. Është bërë progres, por besoj se qytetarin ne duhet ta ndihmojmë me politika bashkëpunuese në nivel qendror”, është shprehur Topi. “Një qytetar i thjeshtë e ka të vështirë të ndajë tematikën e politikës qendrore me atë lokale. Ndërkohë që në vendet që ne dëshirojmë të shkojmë, politikat kanë një ndarje shumë të qartë. Dëshiroj që politika të jetë më profesioniste dhe specifike për qytetarin. Duke përdorur terma të përditshme, rrezikojmë t’i shkëputemi elementëve të rëndësishëm që i interesojnë njerëzve. Shqipëria demokratike ka një kompozicion shumë të larmishëm ku ka edhe njerëz indiferentë dhe neutralë, ku të gjithë së bashku jetojmë në një shoqëri që duhet të gëzojnë të gjitha frytet e taksave që paguajnë”, tha Topi. “Rastin ekstrem e kemi në Tiranë kur ka një projekt të miratuar që në 1989 dhe vjen viti 2011 dhe ende polemizohet për një çështje që ka të bëjë me një element infrastrukturor ku do të kalojnë të gjithë, të majtë e të djathtë. Do dëshiroja që edhe transferimi i pronave të vendoset në funksion të pushtetit vendor”, theksoi Topi.