SHBA: Policia u sulmua, hetimi të jetë i drejtë

Ambasadori i SHBA në Tiranë, Aleksandër Arvizu deklaroi dje se detyra e Prokurorisë së Përgjithshme është bërja e një hetimi gjithëpërfshirës, të drejtë dhe të paanshëm të 21 janarit. Nga Vlora, ku zhvilloi disa takime me përfaqësuesit vendor të këtij qyteti në kuadër të zgjedhjeve vendore të 8 majit, ambasadori Arvizu është ndalur edhe tek ngjarja e 21 janarit. Arvizu theksoi se ajo që ndodhi më 21 janar ishte e tmerrshme pasi aty humbën jetën katër persona dhe qindra të tjerë u plagosën mes tyre edhe efektivave të policisë. Ambasadori i SHBA theksoi se në fillim të demonstratës nga të gjitha pamjet filmike vërehet se policia u sulmua. "Unë do të them vetëm një gjë, ajo që ndodhi më 21 janar ishte një gjë e tmerrshme për vendin. Katër persona vdiqën atë ditë. Në opinionin tim ata nuk duhet të vdisnin. Mbi 100 veta u plagosën atë ditë dhe nga të plagosurit kishte edhe nga ata që ishin pjesë e demonstratës si dhe policë. Nëse i shikoni mediat në fillim të demonstratës policia u sulmua", u shpreh kryediplomati i SHBA-së në Tiranë. Duke shprehur mbështetjen e SHBA-së për hetimin e kësaj ngjarjeje ambasadori Arvizu kërkoi që procesi i hetimit të jetë i paanshëm dhe i drejtë. "Ajo që është e rëndësishme për mua dhe për SHBA është hetimi i plotë. Prandaj dhe detyra e prokurorisë është të hetojë në mënyrë të paanshme. Është shumë e rëndësishme që ky hetim të bëhet në mënyrë të drejtë, gjithëpërfshirëse dhe të paanshme. Më e rëndësishmja është që ky hetim të vazhdojë pa ndërhyrje politike", tha ambasadori Arvizu. Këto deklarata ambasadori i SHBA në Tiranë i bëri gjatë një takimi me të rinj dhe të reja në mjediset e këndit amerikan, në Bibliotekën publike "Shevqet Musaraj", në qytetin e Vlorës, ku ai zhvilloi një vizitë disa orëshe. Gjatë kësaj vizite ai u takua me kryetarin e Bashkisë së Vlorës, Shpëtim Gjika dhe Prefektin e Qarkut, Eduard Veçani, ku, siç u shpreh zoti Arvizu pas takimeve, u diskutua edhe për problemet e zgjedhjeve në këtë zonë.

Zgjedhjet në afatin e përcaktuar, më 8 maj

Shtetet e Bashkuara të Amerikës e konsiderojnë mjaft të rëndësishme zhvillimin e zgjedhjeve vendore më 8 maj. Ambasadori i SHBA-së, Arvizu, theksoi se këto zgjedhje duhet të mbahen në afatin e përcaktuar nga Kushtetuta e Republikës së Shqipërisë. Gjatë një takimi që zhvilloi me të rinj dhe të reja në qytetin e Vlorës, ambasadori Arvizu tha se këto zgjedhje duhet të jenë më të mira se zgjedhjet e kaluara, sikurse zgjedhjet e 2013 duhet të jenë më të mira se zgjedhjet e 8 majit. "SHBA mendon dhe mbështet faktin që është e rëndësishme që këto zgjedhje të ndodhin më 8 maj si e përcakton Kushtetuta. Sepse është një mundësi për qytetarët të zgjedhin drejtuesit e tyre. Është e rëndësishme që këto zgjedhje të jenë më të mirat e deritanishme, ashtu si edhe ato të vitit 2013 duhet të jenë më të mira se ato të vitit 2011. Ato duhet vetëm të përmirësohen dhe të bëhen më të mira, vetëm kur njerëzit do të punojnë që zgjedhjet të jenë më të mira. 20 vjet më parë në Shqipëri u rrëzua komunizmi dhe populli shqiptar nuk do të shohë më komunizmin. Prandaj dhe populli shqiptar e meriton të zhvillojë zgjedhjet", tha ambasadori i SHBA-së në Tiranë