Kutia e Pandorës

Kutia e Pandorës

Si e dinë shumë vetë, është një mit nga mitologjia greke. Edi Rama, që për hir të së vërtetës lexon, patjetër e njeh këtë histori. Sipas saj, thuhet se kur u bë hapja e Kutisë së Pandorës të gjitha të këqijat dolën nga kutia në këtë botë. Këtë besoj se shpreson edhe z. Rama me hapjen e kutive të votimit, por nuk e parashikon se kush janë shkaktarët e të keqes nëse ajo është brenda në kuti. Ka gjasa që socialistët mund të kenë bërë hatanë si në Fier, ku e vodhën gati me dhunë një mandat deputeti. Kjo kuti ishte një dhuratë e Zeusit për Pandorën, e cila ishte e martuar me Titanin Epimete. Kutia nuk duhej të hapej, por Pandora nga kureshtja e saj e tepërt e hapi atë. Edi nuk e hap nga kureshtja, por për të diskredituar rezultatin e zgjedhjeve dhe për t'i treguar botës se ata, shqiptarët, nuk janë në gjendje të zhvillojnë zgjedhje të lira dhe të ndershme. Dhe që nga ajo kohë shumë të këqija erdhën mbi botën. Dhe patjetër në çdo rezultat të mundshëm nga hapja e kutive të votimit, asgjë e mirë nuk do të vijë për Shqipërinë dhe shqiptarët. Para se të hapej kutia, njerëzimi nuk njihte të keqen, lodhjen dhe sëmundjet, dhe njerëzit si edhe zotërat mbi të gjitha ishin të pavdekshëm. Z. Rama me hapjen e kutive beson se mazhoranca do të bjerë nga pushteti dhe Zoti i Shqipërisë do të bëhet ai. Në ditët e sotme hapja e "kutisë së Pandorës" është sinonim për një gjë shumë të ndërlikuar dhe një gjë që sjell fatkeqësi. Edhe për Edi Ramën hapja e kutive të votimit është i njëjti sinonim me Kutinë e Pandorës. Vetëm një gjë nuk ka parashikuar kryetari i vetmuar i Partisë Socialiste: Në cilin drejtim do të fryjnë erërat dhe stuhitë e kutive të votimit. Kthehu në Parlament, Zoti Rama dhe lëre të qetë Kutinë e Pandorës. Kjo është në të mirën e Shqipërisë, shqiptarëve, Partisë Socialiste, pluralizmit dhe demokracisë, por edhe tuajën personalisht.