Zbatimi i ligjit antimafia

Zbatimi i ligjit antimafia - qeveria vendos ngritjen e një komisioni të posaçëm

Kryeministri Berisha përcakton direktivat e implementimit të ligjit dhe apelon për më tepër bashkëpunim institucional në çmontimin me radhë të zinxhirëve të mafies

Kreu i qeverisë foli edhe për liberalizimin e vizave, duke garantuar kancelaritë perëndimore dhe të gjithë qytetarët shqiptarë, se qeveria po bën përpjekjet maksimale për të arritur qëllimin final, lëvizjen e lirë në hapësirën “Schengen” Zbatimi i ligjit anti mafia, i cili që nga dita e djeshme ka hyrë në fuqi, do të monitorohet nga një komision i posaçë, ngritja e të cilit u njoftua sot nga kryeminisrti Sali Berisha. Kreu i qeverisë shtoi se ky ligj është i një rëndësie tepër të veçantë, pasi është i vetmi instrument që do të bëjë të mundur çmontimin e mafies. “Ligji për konfiskimin e aseteve të krimit të organizuar hyn tani në fuqi. Një komitet i veçantë do të ngrihet për të mbikëqyrur zbatimin e këtij ligji. Zbatimi i tij është kusht vendimtar për çmontimin e mafies, konsolidimin e paqes, sigurisë dhe stabilitetit në vend”- tha Berisha. Ai theksoi se po bëhen përpjekje të mëdha për të çmontuar me forcën e ligjit pasuritë e mëdha të përvetësuara nga pushtetarët e të gjitha niveleve gjatë këtyre 18 viteve që kanë bërë batërdinë mbi zonat publike. “Unë kam deklaruar se Mali i Dajtit është më i vogël se sa falsifikimet që kanë bërë në zonat më turistike dhe më të kushtueshme të vendit”- shtoi kryeministri Berisha. Shefi i ekzekutivit, i apeloi të gjithë qytetarëve që disponojnë të dhëna në lidhje me këtë fakt, t’i dorëzojnë ato në interesin më të mirë të vendit. Gjithashtu, kryeministri i bëri apel deputetëve të votojnë moratoriumin e skafeve. “Moratoruimi që ndodhet në parlament pret votën e deputetëve për të dërguar mesazhin më të shkëlqyer të vendosmërisë së autoriteteve shqiptare për luftën me 0 tolerancë ndaj krimit të organziuar”, u shpreh Berisha. Ndërkaq, lidhur me çështjen e liberalizimit të vizave, kryeministri evidentoi progresin e jashtëzakonshëm në këtë proces. Kryeministir pohoi se janë plotësuar një sëri kushtesh që kanë të bëjnë me plotësimin e kërkesave të udhërrëfyesit. Berisha e cilësoi këtë si çështjen kryesore të axhendës e qeverisë dhe të parlamentit. Fjala e plotë e kryeministrit Sali Berisha në mbledhjen e radhës të grupit parlamentar të Partisë Demokratike. “Të nderuar deputetë, Çështja kryesore në axhendën e qeverisë dhe të parlamentit është plotësimi i kërkesave të udhërrëfyesit për heqjen e vizave. Unë po vij këtu nga mbledhja e Komitetit Ndërministror për liberalizimin e vizave dhe mund t’ju informoj me kënaqësi se, në tërësi, ky proces po trajtohet me përgjegjësinë më të madhe. Kjo është e kuptueshme. Në rrafshin kombëtar, nuk ka asgjë tjetër që prek direkt për mirë, më shumë qytetarët shqiptarë, sesa heqja e vizave. Progresi është i madh. Është përfunduar tërësisht sistemi i kontrollit të integruar të kufijve, por edhe sistemi i të dhënave për krimin e kriminalitetin në të gjitha qarqet e vendit dhe janë tashmë të lidhur me qendrën. Janë plotësuar dhe janë në plotësim e sipër një seri kushtesh që kanë të bëjnë me plotësimin e kërkesave të udhërrëfyesit. Janë një seri vendimesh dhe ligjesh që do të miratohen gjatë 2-3 javëve që vijnë, për t’i dhënë përgjigjet më përfundimtare këtij procesi. Ligji për Moratoriumin e skafeve, që ndodhet në parlament, pret firmën tuaj, votën tuaj, për të dërguar mesazhin më të shkëlqyer të vendosmërisë së autoriteteve shqiptare për luftën me zero tolerancë ndaj krimit të organizuar. Ligji për konfiskimin e aseteve të krimit të organizuar, hyn tani në fuqi. Ndërkohë, do të ngrihet një komitet i veçantë për të mbikëqyrur zbatimin e këtij ligji, zbatim i cili është jetik e vendimtar për çmontimin e mafies, konsolidimin e paqes, sigurisë e stabilitetit në vend. Përpjekje të mëdha po bëhen për të çmontuar, me forcën e ligjit, pasuritë e mëdha të përvetësuar nga pushtetarët e të gjitha niveleve, gjatë këtyre 18 viteve, të cilët kanë bërë batërdinë mbi pronat publike të këtij vendi. Unë ju kam deklaruar se Mali i Dajtit është më i vogël sesa falsifikimet e përbindshme që kanë bërë në zonat më turistike, më të çmuara, më të kushtueshme të vendit. Një qytetar nga Vlora më dërgoi një mesazh. Agjencia përkatëse mori kontakt me të dhe ai dorëzoi dokumente që faktojnë katërçipërisht mënyrën e grabitjes dhe plaçkitjes së rreth 500 mijë metra katror sipërfaqe, në pjesën më të bukur të bregut të këtij vendi. Dua t’i shpreh mirënjohjen këtij qytetari dhe ta garantoj atë se qeveria do të vendosë për shpërblimin e tij. Ftoj të gjithë qytetarët që disponojnë të dhëna, t’i dorëzojnë ato, në interesin më të mirë të vendit. I garantoj se, në përputhje me ligjin, ata do të shpërblehen. Ju do thoni se përse unë ftoj qytetarët të dorëzojnë dëshmi me dokumente. Sepse ata që kanë grabitur e plaçkitur, kanë përdorur edhe pushtetin e tyre për të zhdukur, për të mykur, për të pluhurosur sa më shumë dokumentet. Beteja është e vështirë, presionet janë të mëdha dhe të jashtëzakonshme, vullneti është i hekurt. Asgjë nuk mund të pengojë këtë mazhorancë të nxjerrë në dritën e diellit të gjitha të vërtetat e makutërisë së pafundme të ushtruar, të abuzimit të jashtëzakonshëm që është bërë. Numri i pronarëve të regjistruar në mënyrë të paligjshme, ka rrezik tejkalon qartë atë të pronarëve të vërtetë. Nuk mund ta them me saktësi. Ndaj dhe ky ligj që hyn në fuqi këto 2 ditë, ligje të tjera që do të miratohen dhe vendime, do t’u mundësojnë agjencive të zbatimit të ligjit përgjigjen më të përshtatshme ligjore ndaj të gjithë atyre që, edhe në vitin 1952, sillnin të ndjerin Xhani Anjeli në Shqipëri, me dokumente të falsifikuara vetëm e vetëm për të vjedhur prona. Të nderuar deputetë, Përveç moratoriumit të skafeve, janë edhe ligje të tjera të cilat kanë peshën e tyre specifike në kuadrin e procesit të heqjes së vizave. Unë ju ftoj që t’i përparësojmë ato në axhendën tonë. Sikundër, edhe në mbledhjen që sapo zhvilluam, u kam kërkuar ministrive të përparësojnë të gjitha vendimet apo ligjet e domosdoshme për këtë proces. Edhe njëherë, dua të garantoj shqiptarët se brenda vitit të parë të këtij mandati, vendimi për heqjen e vizave për Shqipërinë do të merret dhe se kjo qeveri dhe kjo mazhorancë do të bëjnë çdo përpjekje për ta bërë të mundur këtë vendim. Faleminderit”