Bojkoti parlamentar i PS dëmton jo vetëm popullin shqiptar, por edhe vetë aspiratat e vendit për integrimin evropian

Bojkoti parlamentar i PS dëmton jo vetëm popullin shqiptar, por edhe vetë aspiratat e vendit për integrimin evropian

Këshilli i Europës: Opozita duhet të kthehet në Kuvend

Asambleja Parlamentare e Këshillit të Europës pritet të miratojë së shpejti një rezolutë që dënon ashpër bojkotin e Kuvendit nga opozita në Shqipëri. Projektrezoluta që parashikohet të miratohet më 28 janar është hartuar nga dy raporterët e Këshillit të Europës, të cilët gjatë vitit 2009, zhvilluan një vizitë në Shqipëri dhe u njohën nga afër me situatën politike në vend si dhe masat që po merr qeveria shqiptare në kuadër të liberalizimit të vizave dhe integrimit europian. Konkretisht, në projektrezolutën e përpiluar nga Jaakko Laakso dhe David Uilshire, i kërkohet opozitës që të kthehet në parlament dhe të angazhohet plotësisht në veprimtarinë parlamentare. Projektrezoluta gjithashtu thekson ngritjen e një komisioni hetimor parlamentar për zgjedhjet e 28 qershorit, një kërkesë kjo për të cilën qeveria shqiptare është shprehur kohë më parë e gatshme për ta plotësuar. Dy përfaqësuesit e Këshillit të Europës përmes kësaj rezolute theksojnë se bojkoti parlamentar i Partisë Socialiste dëmton jo vetëm popullin shqiptar, por edhe vetë aspiratat e vendit për integrimin europian. Sipas dy raporterëve të Këshillit të Evropës, ky bojkot dhe mungesa e dialogut dëmton funksionimin e institucioneve demokratike. Në rezolutë nënvizohet se Këshilli i Europës thekson edhe njëherë se dialogu politik duhet të kryhet në Parlament e jo në rrugë. Gjithashtu, përmes kësaj draft-rezolute nënvizohet se bojkoti i opozitës ka dëmtuar marrëdhëniet e Shqipërisë me Asamblenë Parlamentare të Këshillit të Europës për shkak të mungesës së anëtarëve të opozitës në delegacionin parlamentar të Kuvendit të Shqipërisë në këtë Asamble. Dokumenti i mëshon me forcë faktit se është shumë e rëndësishme që deputetët duhet të zënë vendet e tyre në Kuvend brenda 6 muajsh, siç parashikon Kushtetuta. Në këto kushte, Asambleja e Këshillit të Europës angazhohet të japë ndihmën e saj në përmirësimin e klimës politike në Shqipëri dhe vendosjen e themeleve të një dialogu parlamentar.