PS, nën kthetrat e autoritarizmit provincial, lidershipi përcaktohet nga oligarkia

Deputeti majtist Petro Koçi ka shigjetuar dje lidershipin e PS-së, Edi Rama për autoritarizëm provincial në drejtimin e partisë. Duke u shprehur kundër politikës së ndjekur nga Rama në formatimin e partisë, Koçi vuri në dukje se ai e ka pllakosur PS-në nën autoritarizmin e tij provincial dhe lidershipi nuk përcaktohet më nga vullneti i përfaqësuesve të partisë, por nga oligarkia. “PS është mbërthyer nga autoritarizmi provincial dhe lidershipin e saj e përcakton jo me socialisti i thjeshtë, por oligarkia”, tha Koçi. Ai vuri në dukje se ka ardhur momenti që e majta shqiptare të ribëhet, te rithemelohet. “E majta kërkon drejtues mirëfilli të majtë. Të djathtët në drejtimin e së majtës përbëjnë problemin themelor politik dhe organizativ tek spektri aktual i opozitës”, shtoi Koçi. Sipas tij, orientimi kundër autoritarizmit dhe përvijimi i një politike në favor të shtresave të gjëra përbëjnë drejtime kryesore të ribërjes së të majtës në Shqipëri. “Në SHBA , Senatorja Klinton nuk e kishte të vështirë të deklaronte në Ohajo se “Amerikën e kanë bërë amerikanët e thjeshtë”, tha ai. Ndërkohë që Koçi shtoi se zhvillimet e fundit në raportet PS-LSI nuk duhen parë më shumë si ‘përçarje dhe humbje uniteti’ por si shanse që e majta të gjejë vetveten.