Panik në PS nga dështimi i apeleve për të kthyer brenda gardhit Ilir Metën

Partia Socialiste vazhdon me thirrjet e saj indinjuese dhe trishtuese për rikthimin e Metës, i cili pak kohë më parë bojkotoi llogoren e vjetër të Edvinit, me synimin e krijimit të një koalicioni, tipik antipod të PS-së. Thirrjet dëshpëruese, të Edvinit të gjatë disa ditëve me radhë, tashmë janë pasuar nga ato të militantëve partiakë të tij, të cilët nuk reshtin së vajtuari për përçarjen e koalicionit të majtë, duke iu druajtur një dështimi dhe humbje madhore në zgjedhjet parlamentare të 2009-s. E duke e ndjerë këtë hije dështimi, për faktin se disa deputetë nuk do të kenë më prestigjin e uljes në karrigen e deputetit dhe pa gëzuar imunitetin e të qenit ligjvënës, Partisë Socialiste me deputetët e saj, nuk u mbetet gjë tjetër veçse të kërkojnë për çdo ditë e më tepër, rikthimin e Metës në llogoren e ndërtuar posaçërisht nga Edvin Rama e për t’iu kundërvënë reformave të qeverisë Berisha. Kësisoj, dje është zhvilluar një shkëmbim replikash ndërmjet deputetit socialist Taulant Balla dhe kreut të LSI-së, Ilir Meta për përçarjen e opozitës. Në këtë drejtim, deputeti i PS-së i ka bërë thirrje kreut të LSI-së që të kthehej në familjen e përbashkët të së majtës, por më pas ka reaguar edhe kreu i LSI-së. Meta është shprehur se e “E majta për Integrim” është vendi i duhur ku ai duhet të jetë. Ndërsa deputeti i PS-së u shpreh se opozita duhet të lerë mënjanë interesat e saj personale dhe të bashkohet për një politikë të re për të mirën e Shqipërisë. “Ne po punojmë për një politikë të re të bashkimit të të gjithë shqiptarëve përtej kufijve tradicionalë të Partisë Socialiste, përtej kufijve të opozitës së sotme, duke qenë të bindur se përtej interesave partiake, përtej të majtës dhe të djathtës, është Shqipëria e halleve dhe problemeve”, tha Balla.