Bijtë e komunizmit

Bijtë e komunizmit

o Edi Rama, i biri i Kristaq Ramës, anëtar i Komitetit Qendror dhe anëtar i presidiumit të Kuvendit Popullor

o Dashamir Peza, i biri i Myslym Pezës, mbante disa poste të larta në shtetin komunist

o Ilir Gjoni, i biri i Xhelil Gjonit, sekretar i parë i partisë

o Ditmir Bushati, i biri i Sulejman Bushatit, sekretarit të Komitetit të Partisë në Shkodër, anëtar i Komitetit Qendror të PPSH-së

o Ledi Shamku (Enkelejda Shkreli), mbesa e Hamit Shamkut, anëtar i Komitetit Qendror

o Ilir Beqja, i biri i Hamdi Beqës anëtar i Komitetit Qendror

o Fidel Ylli, nipi i Karaman Yllit, sekretar partie, ministër Arsimi

o Alfred Dalipi, dhëndri i Llambi Gegpriftit, kandidat i Byrosë Politike

o Qemal Minxhozi, i biri i sekretarit të parë të partisë në rrethin Mat

o Olta Xhaçka, mbesa e Servet Pëllumbit

Etërit e tyre pushkatuan dhe varën në litar pa gjyqe me mijëra shqiptarë, bijtë kërkojnë revanshin

Kush janë pinjollët e diktaturës që kanë zaptuar kupolën e PS-së

Kupola e partisë kryesore të opozitës është mbërthyer nga pinjollët e diktaturës mizore të komunizmit, të cilët duke shfrytëzuar rangjet e larta politike në krye të PS-së po kërkojnë revansh ndaj demokracisë dhe shtetit ligjor që rrëzoi baballarët e tyre në fillimin e viteve `90. Shumica e tyre u katapultuan në forumet drejtuese të Partisë Socialiste dhe në grupin e saj parlamentar vetëm nga merita e prejardhjes së tyre familjare dhe nga lidhjet me të shkuarën e errët, që mesa duket është nostalgjia në të cilën po përpiqet t`i kthejë shqiptarët krye-pinjolli i diktaturës, Edvin Kristaq Rama. Atëherë kur shumica e shqiptarëve menduan se tashmë u kishin dhënë shkelmin e fundit arkitektëve të gulagëve më të egër të Europës së pasluftës, dhe filluan të mbizotëronin shpresat se Partia Socialiste tashmë ishte shndërruar në një parti moderne duke lënë pas krahëve të shkuarën mizore të paraardhëses së saj, po shfaqen si "kërpudhat pas shiut" bijtë e diktaturës, të cilët jo vetëm po pranohen në gjirin e partisë së baballarëve të tyre, por kanë marrë peng vendimmarrjen e saj. Deri në vjeshtën e vitit 2005, këto elementë nuk kishin ndonjë potencial në vendimmarrjen e PS-së, e cila që nga ndryshimi i emrit deri katër vite më parë është drejtuar nga njerëz pragmatistë dhe me formim politik. Ardhja e të birit të anëtarit të Komitetit Qendror, Edvin Rama, në krye të partisë kryesore të së majtës u rindezi shpresat për pushtet e karrierë politike bijve, nipave e mbesave të "pashallarëve të kuq", të cilët për 45 vjet pushkatuan pa gjyqe, vranë, internuan mijëra shqiptarë dhe dënuan me uri e sëmundje mbi 80 % të tjerë. Pavarësisht vendosmërisë së kësaj kupole për të penguar me çdo kusht hapjen e dosjeve të Ish-sigurimit famëkeq të regjimit komunist, krimet e baballarëve të tyre apo edhe të tyre po bëhen publike çdo ditë për opinionin publik. Frenat e Partisë Socialiste tashmë janë në duart e kësaj çete, të cilëve duket se edhe qëndrime të tilla si mosnjohja e zgjedhjeve, kërkesat për shkelmimin e vendimit të gjykatave apo retorika e ashpër ndaj përfaqësuesve të Perëndimit u vijnë natyrshëm për shkak të brumit me të cilin janë formuar. Ata po dëshmojnë edhe sot pas 20 vitesh pluralizëm dhe funksionimi të demokracisë në Shqipëri, se e kanë të pamundur të përshtaten apo të njohin një tjetër sistem përveç atij të etërve të tyre biologjikë.

Lista

Në krye të listës së pinjollëve të diktaturës që po përpiqen me mish e shpirt të pengojnë shqiptarët në rrugën e tyre drejt Perëndimit është pikërisht kryetari i partisë kryesore të opozitës, i cili ka një backgraund të pasur familjar që lidhet me të periudhën mizore të regjimit komunist. I ati i kryetarit të PS-së, Kristaq Rama ka qenë anëtar i Komitetit Qendror dhe anëtar i Presidiumit të Kuvendit Popullor dhe firma e tij rezulton në disa vendime për vrasje dhe pushkatime të intelektualëve shqiptarë. Deri tani është zbardhur firma që ai ka hedhur për dënimin me varje të poetit Havzi Nela. Rama nuk i ka kërkuar ende falje publike familjes së poetit për këtë akt makabër të të atit, në një kohë kur në gjithë bllokun komunist diktaturat pothuajse kishin rënë. Por Rama nuk e ka fshehur asnjëherë nostalgjinë për kohërat kur ai ishte i përkëdheluri i regjimit në kurriz të mijëra e mijëra shqiptarëve që vuanin për gjëra thelbësore për jetën. Këtë e dëshmon mjaft qartë afrimi i figurave diabolike që i kanë shërbyer me zell regjimit komunist, duke shkuar deri në dhënien e urdhrave për vrasjen e studentëve të cilët protestonin për të drejtat themelore të njeriut. Gramoz Ruçi dhe Skënder Gjinushi janë ilustrime të gjalla për këtë fakt. Listën e pinjollëve të diktaturës e pasojnë bijtë apo bijat e kriminelëve politikë të regjimit komunist, si Ilir Gjoni, i biri i Xhelil Gjonit, i cili njihet për bëmat e tij kur mbante pozicionin e Sekretarit të Parë të Partisë gjatë regjimit komunist. Më pas vjen Ditmir Bushati, i biri i Sekretarit të Komitetit të Partisë në Shkodër dhe anëtar i Komitetit Qendror të PPSH-së, Sulejman Bushati. Edhe ky njihet mjaft mirë për egërsinë e tij ndaj qytetarëve të Shkodrës veçanërisht që ankoheshin për shtypjen nga regjimi i egër monist. Më pas renditjen e merr Ledi Shamku, e cila është mbesa e Hamit Shamkut , anëtar i Komitetit Qendror të PPSH-së. Ajo u katapultua në organet drejtuese të Partisë Socialiste pas ardhjes së Ramës në krye të kësaj partie pavarësisht paaftësisë dhe mungesës së performancës publike. Fakti që ajo është një pasardhëse e denjë e diktaturës, e ka ndihmuar të ngjitet me shpejtësi në forumet drejtuese të partisë kryesore të opozitës dhe të bëhet deputete e saj. Një tjetër pasardhës i denjë i regjimit komunist është Fidel Ylli, nipi i Karaman Yllit, sekretar partie dhe Ministër Arsimi në kohën e diktaturës. Ylli u përfshi në Partinë socialiste nën mantelin e biznesmenit por duket se lidhja më e fortë ashtu si edhe në rastin e Shamkut, ka të bëjë me prejardhjen e tij familjare. Por platforma në miniaturë "proletarë të të gjitha vendeve bashkohuni", e implantuar në strategjinë e reformimit të PS-së nuk ka lënë pa përfshirë edhe nivelet e dyta të lidhjeve familjare me regjimin duke përfshirë edhe dhëndurët. Një rast tipik që e vërteton këtë është ai i Alfred Dalipit, i cili është dhëndërri i Llambi Gegpriftit, kandidat i Byrosë Politike. Ndërkohë edhe ato të reklamuara si prurje të reja në PS, kanë domosdoshmërisht ndonjë lidhje me të shkuarën e Partisë Socialiste. Për këtë të vjen në mendje menjëherë Olta Xhaçka, mbesa e profesorit të stalinizmit në PS, Sërvet Pëllumbit. Nga ana tjetër mund të thuhet se figurat e vjetra të regjimit komunist që thuajse ishin në mbyllje të karrierës së tyre politike në vitin 2005, tashmë kanë fituar pushtet të pazëvendësueshëm në Partinë Socialiste duke lënë krejtësisht në hije ish-ministra e ish-kryeministra socialistë, të cilët nuk kanë një rekord të mirë shërbimi ndaj regjimit të vjetër. Elementë si Namik Dokle, anëtar i Komitetit qendror të Partisë së Punës, Valentina Leskaj, Ndihmëse e Vito Kapos dhe kryeredaktore e revistës "Shqiptarja", Fatmir Xhafaj, Sekretar i Rinisë Komuniste vazhdojnë të drejtojnë vendimmarrjen në forumet më të larta të partisë kryesore të opozitës.