Hapet dialogu për liberalizimin e plotë të vizave mes Shqipërisë dhe BE

Hapet dialogu për liberalizimin e plotë të vizave mes Shqipërisë dhe BE


Berisha: Negociatat, akt madhor besimi për qeverinë shqiptare


Janë hapur dje negociatat për liberalizimin e plotë të vizave mes Shqipërisë dhe vendeve të Bashkimit Europian. Kryeministri Sali Berisha ka pritur dje Zv/Presidentin e Komisionit Europian, Franco Frattini, si dhe ministrin e Brendshëm të Sllovenisë, që mban presidencën e Bashkimit Europian, për procesin e liberalizimit të plotë të vizave, Dragutin Mate. Kryeministri Berisha e siguroi Zëvendëspresidentin Frattini, ministrin e Qeverisë së Sllovenisë dhe përfaqësuesit e vendeve anëtare të BE-së, se qeveria që ai drejton do të bëjë çdo përpjekje për ta merituar këtë besim. Kreu i ekzekutivit theksoi se qeveria do të marrë e zbatojë çdo vendim, ligj e reformë që nevojitet, që ky besim i madh të përdoret në përputhje me standardet evropiane. Berisha e cilësoi hapjen e dialogut për liberalizimin e vizave si një moment historik, duke i dhënë rëndësi lëvizjes së lirë të njerëzve. "Liria e lëvizjes është një nga liritë më themelore të individit dhe çdo hap drejt saj, sikundër edhe drejt lirive të tjera, është hap drejt një të ardhmeje më të mirë. Sot, ne nisim procesin, në përfundim të të cilit shqiptarët do të ndjehen, në aspektin e lëvizjes, qytetarë të hapësirës më të madhe, të hapësirës europiane", tha kreu i ekzekutivit gjatë fjalës së tij. Sipas kryeministrit Berisha, ky proces është, para së gjithash, një akt madhor besimi. Kreu i ekzekutivit bëri të ditur se e ka informuar Zëvendëspresidentin Frattini, ministrin e Brendshëm të Sllovenisë, Mate, përfaqësuesit e vendeve anëtare të BE-së, drejtuesit e Komisionit Europian, se qeveria është në procesin e pajisjes së qytetarëve shqiptarë me letërnjoftimet, pasaportat më të avancuara dhe të standardeve më të mira.

"Ne po dixhitalizojmë tërësisht regjistrin e gjendjes civile, po vendosim një sistem të ri adresash, kemi vendosur kontrollin e integruar të kufijve dhe së shpejti, instalojmë skanerin e parë në doganat tona, për ta përhapur më tej në pikat e tjera kufitare. Ne do të bëjmë çdo përpjekje për të luftuar trafiqet ilegale. Toleranca zero ndaj krimit të organizuar do të mbetet motoja jonë", theksoi kryeministri Berisha gjatë fjalës së tij.

Duke nënvizuar se rezultatet që ka paraqitur Shqipëria janë të qarta, kryeministri tha se qeveria, këto rezultate, do t'i konsolidojë edhe më tej. Berisha e siguroi zyrtarin e lartë të KE-së, se qeveria do të firmosë çdo marrëveshje bashkëpunimi, ekstradimi, ripranimi e të çdo lloji me vendet anëtare të BE-së, duke nënvizuar se këto marrëveshjes do të zbatohen me seriozitetin më të madh. "Shembulli më tipik ishte rasti i djeshëm, kur një nga të konsideruarit "vrasës i shumëfishtë UFO", nga më të rrezikshmit në Itali, Shqipëri e rajon, u kap në rrugët e Tiranës dhe u vendos para ligjit", tha në vijim kryeministri. Në fund të fjalës së tij, kreu i ekzekutivit shprehu mirënjohjen e tij të thellë për Komisionin Europian e vendet anëtare, për besimin e madh që kanë dëshmuar ndaj qeverisë shqiptare.

Ai shprehu mirënjohjen e tij edhe për të gjitha institucionet dhe punonjësit e agjencive të zbatimit të ligjit në Shqipëri, të cilët, me përkushtimin dhe punën e tyre, bënë të mundur që Shqipëria ta fitojë këtë besim që i jepet sot. "Falenderoj të gjitha vendet anëtare të BE-së për bashkëpunimin dhe ndihmën e shkëlqyer që na kanë dhënë gjatë këtyre viteve, institucionet ndërkombëtare, PAMECA, EURALIUS, ICITAP etj., që kanë luajtur një rol shumë të madh në këto reforma. Jam i bindur se në falenderimin tim sot, bashkohet çdo shqiptar që me këtë akt bëhet më i lirë, më dinjitoz e më i sigurt në të ardhmen e tij", theksoi kryeministri. Në këtë kuadër, kryeministri Berisha theksoi se shqiptarët nuk do ta harrojnë kurrë lajmin e madh që Zv/presidenti i KE, Frattini, me ministrin e Brendshëm slloven sollën në Shqipëri për liberalizimin e vizave.

http://www.rilindjademokratike.com/RD%208%20mars/politika.htm

yep