Forum / Përse PS dhe PD e kanë frikë LSI-në

Forum / Përse PS dhe PD e kanë frikë LSI-në
Shkruar nga T.O.
e mërkurë , 05 nëntor 2008
Indeksi i arikujve
Forum / Përse PS dhe PD e kanë frikë LSI-në
Faqe 2
Faqe 1 nga 2
1. Ndryshimet në Kodin Zgjedhor, veç sistemit të ri elektoral do të sjellin dhe ndryshim në Komisionin Qendror të Zgjedhjeve, duke u hequr të drejtën e përfaqësimit Presidentit, Këshillit të Lartë të Drejtësisë dhe partive të vogla. A kemi të bëjmë me një marrëveshje tjetër të pashpallur mes kreut të PS-së, Edi Rama dhe kryeministrit Sali Berisha?

2. Lëvizja Socialiste për Integrim organizoi një tubim para OSBE-së dhe pritet që të përshkallëzojë më tej protestat me argumentin se zgjedhjet janë në rrezik. Përbën vërtet kërcënim për zgjedhjet çështja e anëtarëve të KQZ-së apo LSI po e përdor këtë kartë për t’u bërë faktor mes PS-së dhe PD-së?


3. Reagimi i parë i ndërkombëtarëve ishte se nuk mund të ndërhyjnë në vendimet që mund të marrë Parlamenti me konsensus për këtë çështje. A rrezikohet që pas zgjedhjeve të ardhshme Parlamenti të këtë vetëm përfaqësues të dy forcave kryesore?

Gëzim Podgorica
Analist

1. Kjo në fakt është një marrëveshje e shpallur, pasi ajo është e identifikuar përmes shumë akteve të turpshme e komprometuese, të cilat në sytë e publikut janë njohur që nga 21 prilli, por në fakt datojnë shumë më herët. Lejet e ndërtimit të dhëna nga Rama në kundërshtim me ligjin dhëndrit të Berishës, parkingjet nëntokësorë, ndërtimet pranë digës së Liqenit, por edhe mjaft mirëkuptime të tjera me përfitim ekonomik janë një dëshmi konkrete se si e kanë gjetur gjuhën e bashkëpunimit këta dy aktorë politikë që po luajnë një lojë shumë të rrezikshme për të ardhmen e vendit. Nëse gjashtë vite më parë kishim një marrëveshje pozitë-opozitë, e cila prodhoi institucione konsensuale, tani kemi një marrëveshje, e cila po prodhon hapur marrëveshje konsensuale me përfitim të certifikuar ekonomik. Pikërisht ky është motivi që i ka shuar armiqësitë e tyre të vjetra dhe i ka bashkuar në rrugën e dhunimit të institucioneve, në dhunimin e votës, në dhunimin e fjalës së lirë, në dhunimin dhe shkatërrimin e çdo standardi demokratik që është arritur deri tani. Ata kanë lënë vetëm detyrën dhe servilët e përjetshëm e kanë gjetur çelësin për të deformuar skajshmërisht Kodin Zgjedhor. Mendje diabolike që garantojnë skema fitoresh në PS, por në fakt janë vetëm skema të mbijetesës së imponuar dhe aspak të vërtetë të tyre, pasi kanë kuptuar guston e shefit po servirin një kod që vetëm zgjat mbijetesën e tyre të përçudnuar politike dhe morale, por vijon fatkeqësisht lënien e PS-së në opozitë. Është një kod, i cili investohet tërësisht të përçajë të majtën, të thellojë hendekun e mosbashkëpunimit, duke i dhuruar Berishës pushtetin edhe për katër vite të tjera.

2. LSI është faktor dhe me mbështetjen që ka nuk gjykoj se e kërkon protagonizmin e saj ndërmjet kushtëzimeve në mes PS-së dhe PD-së. Mënyra se si është konceptuar Kodi Zgjedhor, produkt klasik i një karakteri të deformuar dhe mendjeje shumë tinëzare, ku kam parasysh tipa si Xhafa & co, dëshmon se po bëhet përpjekja e parë institucionale për të realizuar një manipulim të hapur të zgjedhjeve të ardhshme dhe vjedhjen e tyre në tavolinë pa shumë mund. Strategjia, megjithëse e pashpallur, por shumë e dukshme është që me çdo kusht të penalizohet LSI, si forca që rrezikon jo vetëm pushtetin politik të Berishës dhe Ramës, por trondit realisht pushtetin ekonomik për të cilin ata po investohen bashkërisht. Zgjedhjet janë shumë në rrezik, aq më tepër kur ruajtja e numërimi do të bëhet pikërisht nga ata që kanë humbur më shumë kreditet e besueshmërisë në këto katër vite qeverisje dhe opozite të pavërtetë e të kastruar. Ka njeri që i beson hajdutit të ruajë shtëpinë?

3. Jo, Parlamenti në çfarëdo lloj kombinimesh politike e llogaritjesh aritmetike që servirin Islamo-Xhafët nuk do të dominohet vetëm nga dy forca politike. Vërtet do të kemi rezultate jo përfaqësuese dhe jo të vërteta, por nuk gjykoj se guximi për të vjedhur do të arrijë deri në çmendurinë e atyre që i frymëzojnë këto veprime. Në këtë vend vazhdon të ketë njerëz me integritet, të cilët nuk do të dorëzohen përballë çfarëdo lloj skeme që përgatitet, aq më shumë që gjendemi në një çast vërtet historik e të domosdoshëm të reagimit popullor. Në se merr jetë projekti politik i Ramës me Berishën për zgjedhjet, Shqipëria ka rrëshqitur me shpejtësi drejt diktaturës dhe kjo nuk është një emfazë. Ky është një realitet që po kuptohet nga votuesi shqiptar, i cili po e kërkon dhe do ta gjejë rrugën e reagimit, aq më shumë që në krye të kësaj kërkese popullore është vënë një subjekt politik i përgjegjshëm dhe që e ka marrë në sy rrezikun e përplasjes. Ky çast shumë kritik, i cili pavarësisht se përpiqet të mbulohet nga disa media me një perde të mëndafshtë, në shumicën e publikut njihet si prostitucion i hapur.

Edmond Arizaj
Analist

1. E pashpallur?! Më e shpallur se kaq nuk ka si bëhet, sepse ndoshta është herët për të dalë së bashku në konferencë shtypi. Është një tjetër formulë e ndërtuar në formën e të mëparshmeve; Berisha mbi të gjitha institucionet e tjera, ndërsa Rama “çlirohet” nga LSI-ja.

2. Nuk është vetëm KQZ, por edhe institucionet e tjera në linjë vertikale që varen prej saj. Dhe në të gjitha këto do të jenë vetëm PS dhe PD. E imagjinoni dot se çfarë do të bëhet? Pazar; më jep 15 vota të LSI-së, të jap 12 të LZHK-së, më jep Partinë Komuniste, të jap Ballin Kombëtar. S’ka lidhje fare se LSI do të bëhet faktor, sepse tashmë ajo është faktor; është opozita e vetme aktuale në Shqipëri.

3. Natyrisht pas votimit në Kuvend dihet që nuk m und të ndërhyjë asnjë ndërkombëtar, si puna e Kushtetutës. Por këtë radhë marrëveshja PS-PD “shfryu”, kështu që edhe ndërkombëtarët për të justifikuar sadopak se nuk janë paguar më kot nga taksapaguesit evropianë, duhet të thonë fjalën e tyre sipas së drejtës dhe jo sipas dhunës së votës. Jo çdo vendim që merret në Parlament me konsensus nga partitë e mëdha është më i miri për vendin. Nuk besoj se Parlamenti i ardhshëm do të përbëhet vetëm nga dy forca, sado manipulime të bëjnë ato.

Elton Tafaruçi
Gazetar, “Ora News”

1. Këtu nuk bëhet fjalë më për një “tjetër”. Ndryshimet në Kodin Zgjedhor tani janë bërë të qarta se janë pjesë dhe rrjedhojë e strategjisë së marrëveshjes së 21 prillit. Këtu nuk ka më shumë vend për supozime. Pas më tepër se 6 muaj, PS dhe PD arritën t’i hapin përfundimisht rrugën vetes dhe pastruan të tërë piacën nga alternativat e tjera, duke konsoliduar në këtë mënyrë më shumë pozitat e tyre. Ato i mbyllën rrugën afirmimit të një polivalence të tretë në kampin politik, i cili vazhdon të ketë si forca kryesore PD-në e Berishës dhe PS-në e Ramës. Me këto ndryshime të dy të fundit u bënë padronë edhe të Komisionit Qendror të Zgjedhjeve, duke ngritur mjaft pikëpyetje në procesin e numërimit të votave. Pothuajse me një shpërfillje totale, dy të mëdhenjtë kanë marrë përsipër që këto ndryshime t’i çojnë deri në fund duke pranuar në mënyrë të pandërgjegjshme që të paguajnë edhe faturën politike me një kosto mjaft të lartë për vendin. Të dy këto forca po përpiqen që të ruajnë domosdoshmërish çifligun e tyre, pa marrë parasysh asnjë lloj konsekuence.

2. Heqja e së drejtës së përfaqësimit të Presidentit, KLD dhe partive të vogla nuk bën gjë tjetër përveç se rrit probabilitetin e një rreziku në zgjedhjet e 2009-s. Kjo lëvizje në sytë e opinionit publik i ngjan më shumë një përpjekjeje për të fshehur diçka dhe në rastin PD-PS për të ndarë dhe përgjysmuar të vërteta. Shqipëria politikisht nuk është akoma e pjekur dhe nuk mund t’ia lejojë vetes luksin që të ketë një sistem bipolar. Edhe pse tendencat e muajve të fundit të demokratëve dhe socialistëve dëshmojnë një realitet të tillë, prapëseprapë shpërndarja e pushtetit në duart e këtyre dy forcave politike në vend nuk ka prodhuar rezultate të një qëndrueshmërie. Ndaj në këtë rast besoj se qëndrojnë të dyja tezat e parashtruar në pyetjen tuaj.
3. Kjo varet shumë edhe nga LSI-ja. Programi me të cilën do të projektohet dhe partitë e vogla përreth saj, alternativat që do të sjellë, kredibiliteti i lojtarëve me të cilët do të përfaqësohet përpara elektoratit. Sa do të jetë konstante në premtimet e saj! Është reale se deri tani PD mbetet në një avantazh të konsiderueshëm ndaj PS-së, pasi në vetvete ka një program më agresiv dhe është më e bindshme në premtimet për dyfishimin e reformave të cilat e kanë lançuar disi më larg. Ndërkohë që PS nga ana tjetër është opake, nuk ofron ndonjë alternativë bindëse dhe nuk ka gjetur akoma strategjinë e duhur për të tërhequr vëmendjen e elektoratit. Denoncimet e saj ndaj mazhorancës kufizohen në konferenca disaminutëshe shtypi me akuza dhe kundërakuza që shpeshherë lënë mjaft për të diskutuar dhe përveç përkufizime shabllone përmbajnë pak të vërteta. Konfrontimi i djeshëm në Parlament ishte shembulli më i mirë i epërsisë së demokratëve. Ai gjeti edhe njëherë të papërgatitur socialistët, të cilët përveç dokumentacionit të Erjon Braçes nuk sollën asnjë gjë të re.