Përfundimi i rrugës Durrës-Kukës do të ketë një ndikim të madh në zhvillimin ekonomik

Përfundimi i rrugës Durrës-Kukës do të ketë një ndikim të madh në zhvillimin ekonomik


Bujqësia, dyfishohen eksportet e prodhimit vendas


Bujqësia shqiptare ka njohur këtë vit zhvillime tepër pozitive me dyfishimin e eksportit të prodhimeve vendase dhe rënien e ndjeshme të importit të tyre. Kryeministri Berisha kërkoi nga Ministria e Bujqësisë përcaktimin e masave të reja për inkurajimin e mëtejshëm të eksportit të prodhimeve bujqësore vendase. "Ky vit ka një zhvillim pozitiv shumë të veçantë. Krahasuar me vitin e kaluar, këtë vit është dyfishuar në vlerë (leku) dhe është mbi dyfishuar në ton eksporti i perimeve shqiptare, si dhe ka një rënie dramatike të importit të perimeve. Ndaj dua të sjell në vëmendjen e Ministrisë së Bujqësisë se duhet të bëhet një përpjekje e dytë e madhe për inkurajimin e mëtejshëm të eksportit të produkteve bujqësore," ka bërë të ditur kryeministri ndërsa ka vlerësuar si tepër efikase në këtë drejtim masat e ndërmarra nga qeveria në mbështetje të zhvillimit të serave me ngrohje, duke kërkuar që e njëjta vëmendja t'i kushtohet edhe zhvillimit të serave me diell. Qeveria, tha kryeministri, ka bërë ndërhyrje të drejtë në ndihmë të serave, duke i ndihmuar në tërësi ato për transformimin e sistemit të ngrohjes nga nafta në mazut, por tani duhet që Ministria të përcaktojë mënyrën sesi me fondin e ardhshëm, në funksion të eksportit, të ndihmojmë serat e diellit. Numri i serave, vijoi më tej kryeministri, krahasuar me një vit më parë, është pesë apo gjashtëfishuar. Në raport me tregun, nga njëra anë është dyfishimi i eksportit të perimeve. Nga ana tjetër, është rënia dramatike e importit të perimeve dhe kjo ka ardhur si rezultat i zhvillimit të këtyre serave. Për më tepër, Kryeministri Berisha theksoi se rritja e prodhimit vendas duhet të shihet në lidhje të ngushtë me eksportin. Në funksion të kësaj, Kryeministri kërkoi nga Ministria e Bujqësisë përcaktimin e një skeme ndihme për serat me diell, në modelin e mbështetjes dhe inkurajimit të zhvillimit të vreshtave. "Ne duhet të përcaktojmë skemën e një ndihme të qeverisë për çdo dynym serë dielli, ashtu siç e bëjmë me të drejtë edhe për çdo dynym vresht" vijoi më tej kryeministri duke theksuar se në zonën kodrinore janë ngritur masivisht sera, çka do të thotë rritje të madhe të prodhimit në këto zona, që mund të jenë të pasura në vreshtari, por jo në prodhim perimesh. Rritja e prodhimit, vlerësoi kryeministri, duhet parë në korrelacion me eksportin, që do të thotë se duke ndihmuar në fuqizimin e serave, ne nxisim njëkohësisht rritjen e eksporteve shqiptare. "Ndaj duke u përqendruar tek vreshtat, ullinjtë dhe mollët, detyrimisht duhet të përqendrohemi fuqishëm edhe tek serat me diell, të cilat kanë gjithashtu disa teknika të thjeshta të ngrohjes. Ne duhet të nxisim zhvillimin e tyre. Nuk ka vend tjetër që të ketë prodhime më të shijshme se prodhimet bio të fermerëve shqiptarë, të pakrahasueshme me prodhimet sintetike, me mutacione gjenetike," vijoi më tej kreu i ekzekutivit duke theksuar se se përfundimi i rrugës Durrës-Kukës do të ketë një ndikim të madh në rritjen e eksportit të këtyre produkteve. Këtë vit, vlerësoi kryeministri, eksporti i perimeve është dy herë më i madh se vitin e kaluar. Vitin e ardhshëm, me ndërtimin e rrugës, eksportet do të jenë absolutisht tre herë më të mëdha, sepse e gjithë Myzeqeja është pothuaj një muaj para Kosovës në prodhimet e saj.