Redaksionale/Kush ndjehet Taulant, të kërkojë të motrën

Redaksionale/Kush ndjehet Taulant, të kërkojë të motrën
(25.07.2008)
Zoti Balla është zgjedhur deputet me një urdhër të pazbardhur ende, por që njihet nga struktura të mirinformuara dhe do të bëhet së shpejti, e njohur për publikun


Përpjekjet e stërmundimshme të disa pseudoanalistëve për të mbështetur veprimin imoral, cinik e ogurzi të Taulant Ballës, me synimin e qartë të provokimit të mazhorancës e të liderit të saj, nuk mund të na ndalin të përvijojmë një linjë morale, përtej së cilës nuk mund të dilet, as kur jemi në sallën e parlamentit, as kur jemi në bar, as në derën e një nevojtoreje publike, bile as kur jemi në motel, për më tepër, as kur jemi në një orgji moteli.
Familja për shqiptarin është e shenjtë dhe cënimi i saj është cënim i qelizës më të fshehur të dinjitetin personal. Edhe në Kuvend, u verifikua veç një sulm verbal i shfrenuar i një deputeti krejt anonim, i pilotuar e pa asnjë fakt (përveç disa thashethemeve që dëgjohen ndër pritje, në hollet e moteleve) kundër familjes së kryeministrit. E përtej këtij sulmi provokues, u regjistrua edhe një avokati. Ndryshe mendojnë vetëm Taulant Balla dhe ata që ndjehen si ai.
Taulant Balla është një deputet krejt i parëndësishëm i Grupit Parlamentar Socialist, për kapacitetin intelektual të të cilit mund të dëgjosh me dhjetëra barcaleta, jo vetëm nëpër bare e pub-e, ku në gjendje deliri të zgjedhurin tonë e zë agimi, por edhe në oborrin e Partisë Socialiste, aty ku gatuhet “politika e re”. Pikërisht, me këto kredenciale, e mori Taulantin Edvini, bash nga plevica e Fatos Nanos, dhe e zgjodhi me misionin e provokatorit, pra me misionin e atij boksierit që është ngarkuar të qëllojë veç poshtë brezit, veç për të marrë barazimin, apo kur ka fat për të garantuar anullimin e lojës. Pse u përzgjodh Taulanti i Çermenikës, e pse iu shkëput thuajse përdhunshëm plevicës së Fatosit, akt që çuditi edhe më të skaliturin me piruetat e politikës shqiptare, duhet të qëmtojmë për nga origjina, për andej nga ka ardhur Taulanti. Për të ndoshta nuk është fort e rëndësishme prejardhja, as trungu familjar e as biografia e mirë, prandaj edhe nuk gjejmë fort të dhëna ndërlidhëse për xhaxhallarë a pinjoj që kanë nderuar atë derë. Edhe në cv-në intelektuale nuk gjejmë kurrfarë veçimi që të mund të interpretojmë disi katapultimin e Ballës në listën e deputetëve socialistë, prandaj edhe arsyet e futjes së tij në politikë kanë shpjegime okulte. Në fakt, Zoti Balla është zgjedhur deputet me një urdhër të pazbardhur ende, por ajo njihet mirë nga struktura të mirinformuara dhe do të bëhet e njohur për publikun, së afërmi, ndoshta pa patur nevojë për të pritur provokimin e radhës, kur të kenë mbaruar 15 ditët e ndëshkimit parlamentar dhe padronët okultë t’i japin Taulantit recetën e provokimit të ri, e cila afërmendsh do të ketë të bëjë sërish me cënimin e moralit personal e qeverisës me të cilin është mbrujtur mazhoranca e djathtë.