Zbardhet shpifja e të majtëve. PS duhet të lëpijë atë që pështyu. Reagon kryebashkiakja, Adriana Poli Bortone

Zbardhet shpifja e të majtëve. PS duhet të lëpijë atë që pështyu. Reagon kryebashkiakja, Adriana Poli Bortone


Bashkia e Leçes: Marrjen e rërës e aprovoi kryebashkiaku i Vlorës


Adriana Poli Bortone, Kryetarja e Bashkisë së Leçes, ka zbardhur të vërtetën e projektit për marrjen e rërës nga bregdeti i Vlorës për ta dërguar atë në plazhet e rajonit të Leçes. Gjatë një interviste të dhënë për gazetën lokale, "ilpaesenuovo", Adriana Poli Bortone, ose sikurse njihet ndryshe nga qytetarët e Leçes, Poli ka bërë të qartë se nuk bëhet fjalë për asnjë marrëveshje me qeverinë shqiptare të kryeministrit Berisha, por me kryebashkiakun socialist të Vlorës, Shpëtim Gjika.

"Ndërkohë, një lajm i mirë vjen pikërisht nga Shqipëria, komshinjve, të të cilëve Poli u ishte drejtuar për të gjetur një zgjidhje. Kryebashkiaku i Vlorës është deklaruar në favor për të autorizuar marrjen e rërës në një territor nën kopetencat e tij, gjithmonë nëse do të jetë në përputhje me bregdetin salentin. Edhe pse shumë ngushëlluese, tani për tani, mundësia nuk mund të shrytëzohet menjëherë, për shkak se, fillimisht duhet mbajtur paraprakisht një komision shkencor për të operuar transferimin e rërës. Pra, komuna nuk duket se ka ndër mend të dorëzohet dhe lufta e rërës po duket mjaft e vështirë", thuhet në gazetën lokale të Leçes e cila u referohet deklaratave të kryebashkiakes së Leçes.

Reagimi i zyrtarëve të Leçes ka ardhur pas zhurmës së bërë në mediat e majta shqiptare, të cilat pa e konfrmuar lajmin tek autoritetet zyrtare të Tiranës, e ofruan atë si një të vërtetë absolute, duke nisur edhe komentet lidhur me shitjen që po i bëka vendit qeveria e kryeministrit "Berisha". Dy ditë më parë qeveria përgënjeshtroi lajmin e ofruar në këto media se nuk bëhet fjalë për asnjë kontratë për shitjen e rërës, megjithatë askush nuk guxoi që të përgënjeshtrojë lajmin mashtrues të ofruar për publikun.

Sipas mediave, bëhet fjalë për një kontratë që arrin në shumën e 5 milion eurove që janë ofruar nga rajoni i Leçes për të blerë rërën e bregdetit të Vlorës dhe për ta dërguar atë në plazhet italiane të atij rajoni. Por, sikurse po bëhet e qartë nga drejtuesit lokalë të Leçes, marrëveshja nuk qenka bërë me qeverinë e Berishës, por me kryebashkiakun socialist të Vlorës, Shpëtim Gjika. Ky i fundit, ka marrë përsipër të shesë rërën e bregdetit të Vlorës, duke e konsideruar atë si pronë të tijën dhe kjo konfirmohet edhe nga bisedat me drejtuesit lokalë të Leçes, ku i thuhet se "Kryebashkiaku i Vlorës është deklaruar në favor për të autorizuar marrjen e rërës në një territor nën kopetencat e tij, gjithmonë nëse do të jetë në përputhje me bregdetin salentin". Pra kryebashkiaku socialist, jo vetëm që ka vendosur ta shesë, por edhe i është lutur autoriteteve të Leçes, duke i lënë edhe klauzolën "gjithmonë nëse do të jetë në përputhje me bregdetin salentin".


Beteja e pisët në Kuvend. PS duhet të lëpijë atë që pështyu


Beteja për "rërën" ka zbritur dje në Kuvend. Kryetarja e Grupit parlamentar Socialist, Leskaj dhe deputetë të tjerë të kësaj force, i kanë mëshuar fort skandalit që, sipas tyre, qenka përshirë qeveria "Berisha', duke shitur rërën e bregdetit të Vlorës në brigjet italiane. E gjithë kjo zhurmë është e ngritur mbi një mashtrim skandaloz dhe të paskrupullt dhe që nuk ka asgjë me të vërtetën. Sikurse të gjitha betejat e socialistëve të ngritur mbi piramida mashtrimi, edhe kjo tollumbace ka plasur keq. Tashmë socialistët duhet të lëpijnë atë që kanë pështyrë përgjatë këtyre 48 orëve, së bashku me mediat e kontrolluara prej saj. Kjo për faktin se, marrëveshja për shitjen e rërës nuk qenka bërë me qeverinë Berisha, por me Bashkinë e Vlorës, e cila drejtohet nga një prej njerëzve më të afërt të kryetarit të PS dhe që quhet Shpëtim Gjika. Është ky drejtues socialist, i cili duhet të japë llogari tani se, si ka mundësi që të arrijë pakte të tilla të fshehta për shitjen e rërës së bregdetit të Vlorës. Mos ndoshta duke pasur një marrëveshje të fshehtë të Gjikës synohej që rëra të merrej në mënyrë të fshehtë dhe ato 5 milion euro që do të jepeshin, të përfundonin në xhepat e drejtuese lokalë socalistë? Ka një praktikë të gjatë të vjedhjes së rërës nga brigjet shqiptare dhe kjo ka ndodhur gjatë tetë viteve të qeverisjes së PS dhe në të gjitha ato bashki dhe komuna ku kanë drejtuar socialistët. Dhe në asnjë rast nuk është bërë e ditur se në xhepat e kujt kanë përfunduar ato para me të cilat është blerë rëra nga vendet fqinje. Fakt është se në xhepat e shtetit nuk ka shkuar asnjë kacidhe dhe kjo të lë të dyshosh se edhe kësaj here, ndoshta Gjika i PS, synonte sërish të arrinte të njëjtin synim.