Fried: Shqipëria, anëtare me të drejta të plota në NATO, brenda prillit 2009

Fried: Shqipëria, anëtare me të drejta të plota në NATO, brenda prillit 2009


Ritmi i reformave në Shqipëri i krijon të gjitha kushtet që ky vend të bëhet anëtar me të drejta të plota në Aleancën Euroatlantike. Ndihmëssekretari amerikan i Shtetit për Çështjet e Evropës dhe Euroazisë, Daniel Fried, në një seancë dëgjimore organizuar nga Nënkomiteti për Çështjet e Evropës pranë Komitetit të Politikës së Jashtme së Dhomës së Përfaqësuesve, Ëashington DC., e cila u mbajt në Kongresin e SHBA-së, tha se Shqipëria ka forcuar demokracinë dhe ka arritur një stabilitet të brendshëm. Kjo, sipas Fried, i jep asaj të gjitha shanset që të bëhet anëtare me të drejta të plota në Aleancën e Atlantikut të Veriut, brenda prillit të vitit të ardhshëm. Të njëjtat vlerësime Ndihmëssekretari amerikan i Shtetit për Çështjet e Evropës dhe Euroazisë bëri edhe për Kroacinë. Ai vlerësoi se Shqipëria dhe Kroacia janë tashmë kontribues të vlefshëm të misioneve të NATO-s. Duke folur në seancë, kongresmeni Joe Ëillson i Karolinës së Jugut tha se kishte dëgjuar përpara shumë vitesh "Radio Tiranën" dhe se sot ishte i impresionuar që Shqipëria nga një vend i izoluar "maoist", përkrah gjerësisht anëtarësimin në NATO. Në vijim, ai u interesua për procedurat që duhet të ndiqen pas marrjes së ftesës, deri në anëtarësimin e plotë dhe se kur mund të anëtarësohet plotësisht në NATO Shqipëria dhe Kroacia. Në përgjigjen e tij, Fried, pasi sqaroi procedurat postftesë të ratifikimeve dhe vazhdimit të bisedimeve politiko-teknike, deklaroi se kjo procedurë mund të zgjasë një vit apo diçka më shumë. Por, ai shprehu bindjen se "Shqipëria dhe Kroacia, me këtë ritëm reformash do të bëhen anëtare të Aleancës brenda një viti, pra në prill 2009". Gjatë fjalës së tij, Fried bëri një përmbledhje të qëndrimeve të qeverisë amerikane në kuadër të politikave të NATO-s, duke u përqëndruar në operacionet kyç të Aleancës në Afganistan, Irak dhe Kosovë, zgjerimin e NATO-s dhe politika e dyerve të hapura. Gjatë kësaj seance me temë "Samiti i Bukureshtit dhe rruga drejt NATO-s", folën Daniel Fried, Ndihmëssekretar i Shtetit për Çështjet e Evropës dhe Euroazisë dhe Daniel Fata, Zv.Asistent i Sekretarit të Mbrojtjes për Politikat Evropiane dhe të NATO-s.


NATO do të vazhdojë të qëndrojë në Kosovë


Ndihmëssekretari amerikan i Shtetit për Çështjet e Evropës dhe Euroazisë, Daniel Fried, deklaroi vazhdimësinë e qëndrimit në Kosovë si një domosdoshmëri për siguri dhe stabilitet, e rrjedhimisht dhe një kontribut për lirinë e lëvizjes, mbrojtjen e minoriteteve dhe "zonave" fetare. NATO, vazhdoi ai, e ka bërë të qartë se do të vazhdojë të luajë një rol kyç në themelimin e një Force të re Sigurie Multietnike në Kosovë, nën mbikëqyrjen e një agjencie civile të qeverisë. Seanca dëgjimore zgjati për më shumë se dy orë dhe folësit biseduan rreth çështjeve kryesore që lidhen me problematikën e zgjerimit të NATO-s, marrëdhëniet mes shteteve anëtare, shtrirjen dhe konsolidimin e misioneve ndërkombëtare, sistemin mbrojtës dhe çështje të tjera. Shkëmbimi i mendimeve gjatë seancës dëgjimore përfshinte pothuajse të gjithë temat e mësipërme, pasi çështja e zgjerimit të aleancës me vende si Gjeorgjia dhe Ukraina, çështja e raketave mbrojtëse, çështja e misioneve ndërkombëtare janë strategjike për politikën e jashtme të SHBA-së.