Gjinushi nuk mbështet reformën Kushtetuese, megjithëse askush nuk i ka caktuar rol në këtë proces

Gjinushi nuk mbështet reformën Kushtetuese, megjithëse askush nuk i ka caktuar rol në këtë proces
(18.04.2008)
Partia Socialdemokrate, megjithë vaktësinë dhe shterpësinë e drejtuesve të saj, e njëkohësisht pa asnjë lloj kontributi në politikën shqiptare, por thjesht me qëndrime qesharake, kërcënon se nuk do të mbështesë proceset reformuese në kushtetutë. I ndodhur përballë faktit se partitë e tjera politike e kanë lënë në hije, Gjinushi ka deklaruar dje se nuk do të përkrahë reformën Kushtetutese, pasi sipas tij është një pseudoreformë kushtetuese. “Kushtetuta mund të ndryshohet vetëm për sistemin zgjedhor, meqenëse jemi para një reforme të detyruar zgjedhore, por këto ndryshime nuk mund të godasin edhe institucionet e tjera”, tha ai, duke treguar qartë se vazhdon të ecë me ecejakjet e interesave politike, për faktin se për reformën zgjedhore ka rënë në ujdi me Edvinin, për të lënë në hije koalicionin e sapo krijuar e “Majta për Integrim”. Në këtë aspekt, PSD, do të mbështesë ndryshimet kushtetuese që kanë të bëjnë vetëm me reformën zgjedhore, se në këtë mënyrë nuk preken ambiciet e Gjinushit, por kur vjen puna për ndryshimet e neneve kushtetuese që kanë të bëjnë me zgjedhjen e presidentit apo edhe cështje të tjera, kjo parti, pa i marrë mendim askush zgjedh bojkotin. Sipas Gjinushit, nuk ka pasur asnjë debat për reformë kushtetuese dhe kjo reformë nuk bëhet rrugëve dhe me emocione dhe aq më tepër kur nuk ka lindur nevoja për një gjë të tillë. “Kushtetuta është tepër e re, është më e re se sa shumica e politikanëve, kështu që nuk mund të ndryshohet Kushtetuta pa u ndryshuar së pari, ata që nuk duan ta zbatojnë atë. Ne nuk hyjmë në debate se si duhet të zgjidhet Presidenti, pasi asnjë se ka kuptuar logjikën e kësaj Kushtetute, e cila është konceptuar me shumë kujdes”, theksoi ai. Në këtë drejtim ai vuri në dukje, se “për hartimin e kësaj Kushtetute ka punuar me mjaft kujdes Komisioni i Venecias, ndërkohë që ajo është miratuar me referendum popullor”. Rrjedhimisht, sipas tij, nëse lind nevoja për ndryshime, patjetër që këto duhen konceptuar si një paketë, pasi nenet e Kushtetutës kanë logjikën e tyre dhe janë të lidhur me njëra-tjetrën. “Po preke nenin që ka të bëjë me Presidentin e Republikës, Presidenti është kryetar i KLD-së, është ai që balancon pushtetet nëpërmjet shumicës parlamentare dhe nuk mund të jetë kurrë i një ngjyre me shumicën parlamentare”, tha Gjinushi. Sipas tij, Kushtetuta nuk mund të ndryshohet në mënyrë amatoreske, ndaj dhe PSD nuk do të mbështesë PS-së në këtë nismë.