Presidenti takon kryetarë të shoqatave të medias

Presidenti takon kryetarë të shoqatave të medias


Presidenti i Republikës, Bamir Topi, zhvilloi dje një takim me kryetarë të shoqatave të medias në Shqipëri. Gjatë takimit të pranishmit i paraqitën Presidentit Topi shqetësimin e tyre lidhur me një urdhër të Ministrit të Financave, i cili përcakton numrin e punonjësve të siguruar që duhet të ketë një media e shkruar në raport me numrin e faqeve të saj. Për kryetarët e shoqatave, ky është një qëndrim arbitrar dhe një urdhër i pambështetur në ligj, që cënon misionin e shtypit të shkruar në Shqipëri. Pasi dëgjoi me vëmendje shqetësimet e tyre, Presidenti i Republikës u shpreh se do e ndjekë me kujdes këtë çështje nëpërmjet stafit të tij, por edhe takimeve të punës, për të gjetur një ekuilibër logjik në zbatimin e ligjit në mënyrë korrekte. Gjithashtu, kryetarët e shoqatave u shprehën të hapur për t'u kontrolluar nga shteti, por sipas tyre, për shkak të specifikës së saj si biznes i lirë, një media e shkruar duke mos patur faqe standarde, mund të punësojë gazetarë apo bashkëpunëtorë sipas fuqisë së saj e jo të përcaktuar paraprakisht. Ndër të tjera Kryetarët e shoqatave të medias i paraqitën Presidentit shqetësimin se një urdhër i tillë, i pakonsultuar me këtë grup interesi, mund ta penalizojë shtypin në mënyrë selektive. Kryetarët e shoqatave të medias u shprehën se hartimi i një ligji për shtypin e shkruar, do të rregullonte aktivitetin e tyre duke shmangur urdhëra të tillë. Gjatë takimit ishin të prnaishëm, Armand Shkullaku Kryetar i Shoqatës së Gazetarëve Profesionistë, Mero Baze Kryetar i Forumit Shqiptar për media të lira, Ylli Rakipi Kryetar i Shoqatës së Gazetarëve të Shqipërisë dhe Aleksandër Çipa Kryetar i Unionit të Gazetarëve