Shqipëria në NATO, Rama-PS në protesta

Kur kanë mbetur vetëm pak orë nga Samiti i Bukureshtit PS ka vendosur ta presë me protesta përmbushjen e aspiratës së shqiptarëve


Shqipëria në NATO, Rama-PS në protesta


Kur kanë mbetur vetëm pak orë nga një prej ngjarjeve më të rëndësishme historike të Shqipërisë së pas diktaturës, ajo e pranimit të Shqipërisë në gjirin e vendeve të Aleancës më të fuqishme ushtarake të Atlantikut të Veriut, kryetari i PS, Rama, guxoi dje dhe deklaroi nisjen e protestave në Tiranë, në të njëjtën ditë që NATO do të hapë dyert për Shqipërinë.

Pavarësisht retorikës së Ramës se protestat do të jenë kundër qeverisë dhe jo kundër NATO-s, nëse do të shihen qëndrimet e vazhdueshme të Ramës gjatë këtyre muajve, është lehtësisht e dallueshme që të lexosh, përmes tyre, se qëllimi kryesor i këtij individi të ardhur në krye të PS ka qenë bllokimi i të gjitha proceseve integruese të vendit në strukturat euroatlantike. Është mjaft domethënëse se protesta është lajmëruar në të njëjtën ditë kur shqiptarët duhet të dilnin ndoshta në shesh, për të përshëndetur këtë arritje mjaft të rëndësishme dhe një ndër objektivat më madhore të vendosur nga forcat antikomuniste që në vitin 1991.

Shqipëria, një vend i NATO-s, një aleat i Perëndimit, po shikohet nga kryetari i PS-së si një disfatë e tij politike për ta bllokuar këtë proces. Dhe në të vërtetë ka qenë dhe mbetet një disfatë politike për sa kohë Rama u identifikua edhe gjatë ditëve të fundit si bllokues i saj. Vetëm 36 orë pas shpërthimit të Gërdecit, Rama doli në konferencë shtypi duke kërcënuar dhe duke iu drejtuar jo vetëm qeverisë, por dhe vendeve aleate, se ai do të niste protestat dhe lëvizjet politike bllokuese në rast se procesi i anëtarësimit të Shqipërisë në Aleancë nuk shoqërohej me dorëheqjen e kryeministrit Berisha.

Synohej që përmes protestave, Rama ta paraqiste Shqipërinë një vend, të cilit i mungonte stabiliteti i domosdoshëm politik, i kërkuar nga NATO-ja, për t'u pranuar në Aleancë. Aleanca e tij me të keqen, vdekjen dhe tragjedinë e Gërdecit u bë e dukshme kur urdhëroi strukturat e partisë së tij që të nisnin menjëherë protestat në Vorë. Në një kohë që zhvillohej procesi mortor i njërit prej viktimave të tragjedisë, disa njerëz të blerë nga Rama dhe njerëzit e tij nisën thirrjet "poshtë qeveria", që për shumë nga të pranishmit u përkthyen si "rroftë vdekja". Por ato protesta të iniciuara drejtpërdrejt nga Rama, në vend që të kishin impaktin që kryetari i PS dëshironte të kishin në favor të lëvizjeve të tij politike, patën një efekt të kundërt, duke irrituar më shumë njerëzit dhe duke sjellë një bojkotim gjithnjë dhe më të madh të qytetarisë ndaj këtyre lëvizjeve politike. Tregues i qartë i kësaj ishte edhe dështimi i "marshimit të heshtur" në Bulevardin "Dëshmorët e Kombit", të cilit iu bashkuan vetëm rreth katër apo pesë mijë militantë socialistë, ndërsa Tirana e bojkotoi atë. Duke parë dështimin e këtyre protestave, duke qenë i bindur se realiteti nuk e mundësonte atë që të vazhdonte t'u imponohej aleatëve të Shqipërisë që të pranonin kushtet e tij për afrimin në NATO, Rama bëri një lëvizje 180 gradë, duke dalë në konferenca shtypi dhe duke propaganduar gjoja se ishte në favor të NATO-s. Dhe ky njeri kontradiktor deri në ekstrem me veten e tij është bërë aq qesharak, sa edhe pas këtyre thirrjeve i bën karshillëk vendimit të Aleancës, duke shpalllur në të njëjtën ditë fillimin e protestave kundër qeverisë që afroi vendin në NATO.