FIFA pezullon Shqipërinë nga aktivitetet futbollistike

FIFA pezullon Shqipërinë nga aktivitetet futbollistike
Nga Gerti Carcani

Shqipëria është pezulluar nga të gjitha aktivitetet ndërkombëtare futbollistike. Vendimi është marrë nga Komiteti Ekzekutiv i FIFA-s. Ndërhyrje e rëndë e politikës, ky ka qenë argumenti i përdorur nga FIFA për të mos lejuar më futbollin shqiptar të jetë i pranishëm në arenën ndërkombëtare.

Vendimi ishte i pritshëm, për shkak se organizmat më të lartë të futbollit kishin kohë që e kishin paralajmëruar një gjë të tillë. Madje, ata kishin vendosur një datë ultimative, pikërisht 21 shkurtin, kur pritej reflektim nga ana e Ministrisë së Sportit. Por, pikërisht kur gjërat duket se po shkonin drejt përmirësimit dhe ministri Pango firmosi statutin me ndryshime të kësaj federate, gjërat u përmbysën. Ndryshimet e firmosura nga Pango janë kundërshtuar menjëherë nga FSHF-ja, e cila ka kërkuar nga UEFA dhe FIFA që të ndërhyjnë sërish për këtë çështje.

Më datë 22 shkurt, UEFA ka reaguar për rindezjen e konfliktit MTKRS-FSHF, duke i kërkuar ministrisë të firmosë plotësisht statutin e FSHF-së. Sipas UEFA-s, në rast se ministri Pango nuk e firmoste statutin, atëherë çështja e Shqipërisë kalonte në Komitetin Ekzekutiv të UEFA-s dhe aty do te merrej menjëherë vendimi për përjashtimin e Shqipërisë. Dhe, vetëm pak më shumë se njëzet ditë më vonë, nga Tokio vjen verdikti: Shqipëria nuk do marrë pjesë në asnjë aktivitet.


Historiku


Përplasjet nisën menjëherë pas ndryshimit të qeverive. Disa herë u iniciuan nga qeveritë demokratike kontrolle në këtë federatë për mënyrën e përdorimit të fondeve. Por, një gjë e tillë u kundërshtua nga Federata Shqiptare e Futbollit, e cila e quajti këtë ndërhyrje të shtetit në pavarësinë e saj. Federata u mbrojt para organizatave ndërkombëtare, duke theksuar se fondet që do kontrollohen janë edhe të UEFA-s dhe të FIFA-s, por një gjë e tillë u hodh poshtë nga Ministria e Kulturës, Rinisë dhe Sporteve dhe nga Ministria e Financave.

Pas një periudhe heshtjeje, me mbërritjen e ministrit të ri konflikti u rindez, pas një urdhri kontrolli për fondet e FSHF-së. Menjëherë vjen reagimi i FIFA-s, që është ultimative; 21 shkurt 2008 do ishte limiti kur ministria duhej t’iu jepte zgjidhje problemeve që kishin lindur me Federatën Shqiptare të Futbollit. Por, një javë më vonë, në zyrat e FSHF-së mbërrin grupi i auditimit. Situata acarohet, por zbutet pasi Pango firmos statutin me ndryshime, por me një kleçkë, e cila “zbulohet” nga FSHF dhe ngre alarmin.

Statuti i FSHF-së, i firmosur nga ministri i MTKRS-së, Ylli Pango, është dërguar në FSHF me kërkesën për të bërë disa ndryshime nga kjo e fundit.

Por, krerët e saj bëjnë të ditur se ndryshimet në statut i bën vetëm asambleja, por është e pamundur që kjo të realizohet, sepse asambleja është mbledhur njëherë në muajin qershor. Me ndryshimet e kërkuara nga MTKRS, federata nuk mund ta regjistrojë statutin në gjykatë, çka përbën një tjetër handikap mes FSHF-së dhe shtetit.

Kësaj radhe, reagimi i FIFA-s do ishte përfundimtar: Shqipëria u pezullua.


Përjashtim edhe për ekipet e kampionatit




Shqipëria ndodhet në grupin 1 eliminator të Kampionatin Botëror “Afrika 2010”, së bashku me Suedinë, Portugalinë, Danimarkën, Hungarinë e Maltën. Ekipet shqiptare nuk do të kenë asnjë mundësi të luajnë në kompeticionet ndërkombëtare si Liga e Kampioneve, Kupa UEFA apo Kupa Intertoto.


Për Spanjën, vazhdon vëzhgimi nga afër




Për sa i përket Spanjës, sipas asaj që shkruhet në komunikatën e shtypit, FIFA vendosi të monitorjë situatën, duke i lënë një afat tetëmujor. Situata në Turqi do të vazhdojë të monitorohet, ndërkohë që pezullime mund të pësojnë Magadaskari, Kuvajti dhe Dominika, në rast se ato nuk ndryshojnë qëndrim.


FIFA: Do vazhdojmë monitorimin për Kosovën




Pas kërkesës së Kosovës për anëtarësim në organizmat ndërkombëtare të futbollit, FIFA ka deklaruar dje përmes Komitetit Ekzekutiv, se do vazhdojë monitorimin e afërt, duke parë gjithashtu edhe reagimet e diplomacisë ndaj problemit të Kosovës