Rama Vodhi Nismen e Berishes:Shqiperia 1€

Edi Rama në shtrëngesë të madhe për investime dhe në panik nga shtimi i radhëve të papunëve dhe perspektiva e zymtë ekonomike, është rikthyer tek teza e Sali Berishës “Shqipëria 1 euro”. Në Milano në një takim me biznesin italian, Rama është detyruar që të huazojë nismën e Berishës duke qenë se vetë nuk ka asnjë iniciativën për të paraqitur Shqipërinë si vend tërheqës për investitorët e huaj. Por kundërshtari i tij politik e ka frymëzuar Ramën në një situatë shumë të vështirë ku qeveria shqiptare është gati të ngrejë duart e t’i dorëzohet krizës që ka provokuar vetë. Të gjithë tashmë e dinë se qeveria në një akt të theksuar të mungesës së kurajos dhe transparencës ka kaluar buxhetin e vitit 2014, ku biznesi rëndohet me taksë shumë të lartë. Situata alarmante në lidhje me fondet, borxhin, taksimin, investimet publike etj e kanë kthyer Shqipërinë në një vend jo miqësor për biznesin. Vetë qeveria në një akt të pashëmbullt të historisë 23 vjecare të demokracisë,ka miratuar në fshehtësi buxhetin sikur të ishte buxheti i një qeverie hajdute dhe jo e shqiptarëve. E çuditshme gjithsesi mbetet nga njëra anë frika e qeverisë për të qenë transparent para popullit të saj dhe nga ana tjetër përqafimi i nismës “Shqipëria 1 euro” që synon të ndihmojë klimën e biznesit në vendin tonë. Kësaj radhe është Rama që ofron për investitorët e huaj kazerma dhe ndërtesa të reparteve ushtarake shqiptare, por që me infrastrukturën e rrënuar dhe mungesën e energjisë dhe ujit në godinat e ushtrisë, është si të investosh nga fillimi në një shtet që nuk i ndihmon investitorët. Mënyra e shëmtuar dhe e pakuptimtë e miratimit në errësirë të buxhetit që supozohej se do i jepte vendit shpresë për të mos qenë në vazhdën e qeverisjes së mëparshme, është një ogur makbethian për Kryeministrin shqiptar. Dhe duke parë këtë sjellje arrogante të parit të vendit, tashmë biznesi ka dhënë paralajmërime shumë serioze për jetëgjatësinë e kësaj qeverie. Duket se qeverisja e papërgjeshme dhe nihiliste e Ramës nuk ka ngjallur ndonjë interes të vecantë ke biznesi, i cili pret shlyerjen e detyrimeve të premtuara. E ndërsa Rama gjoja udhëton jashtë vendit për takime me biznesin e huaj, brenda Shqipërisë biznesi po bashkohet rreth opozitës. Në vetëm 5 muaj qeverisje Rama ka shkelmuar me vetëdije interesat shumëdimensionale të biznesit dhe duke shënuar edhe hapa mbrapa me situatën e rendit dhe sigurisë,a i ka bërë bashkë dy vektorë shumë të rëndësishën dhe shumë të rrezikshëm për n jë qeveri. Rama ka kundër biznesin vendas dhe të huaj plus opozitën. Sado të parëndësishëm që të gjykojë Rama se janë këta vektorë, e vërteta është shumë ndryshe. Kjo pasi biznesi është aleat i kapitalizmit dhe liberalizmit ekonomik ku paratë që mbeten në fund të ditës në xhep janë më të rëndësishme se parrullat ideologjike që shryjnë antarët e kabinetit të Ramës nëpër televizione. Bizneset kanë në dorë mbylljen e aktiviteteve me shpalljen e falimentit, bllokimin e zhvillimit dhe nxjerrjes në rrugë me një dorë të vetme të qindra mijëra punonjësve. Këta të fundit të shtrënguar nga nevoja do të mund të ishin një arsye shumë e mirë që Rama të tregonte vetpërmbajtje dhe respekt. Kjo nuk po ndodh dhe Rama po e injoron këtë fakt. Tryeza e djeshme e opozitës me biznesin dhe kërkesa e investitorëve ndaj PD-së për ndihmë që të imponohen ke qeveria që ajo të rishikojë paketën fiskale, është një shenjë se bizneset kanë mundësinë e kundërvënies dinjitoze ndaj qeverisë me mënyra nga më të mundshmet. Paketa fiskale e miratuar nga Rama në errësirë dhe arrogancë nuk reflekton dëshirën dhe vullnetin e ftesës që është paraqitur nga Kryeministri në Itali. Rama vazhdon të injorojë kërkesat e biznesit brenda vendit dhe i konsideron përfaqësuesit e këtij biznesi të pafuqishëm. Nga ana tjetër Rama ka shumë pak vlerësim për kundërshtarët e tij politikë duke i provokuar gjithë kohës me sulme nga më të paimagjinuarat që nuk bëjnë gjë tjetër vecse unifikojnë pakënaqësinë ndaj tij dhe ministrave axhami që ai ka zgjedhur për të vënë nën këmbë shoqërinë shqiptare. Kjo situatë e panjohur për Shqipërinë dhe për aktorët e lojës politike dhe botës së biznesit po bëhet shumë e paqëndrueshme për qeverinë Rama. Dhe ky i fundit ka filluar tashmë të ndjejë se nismat dhe entusiazmi i Berishës mund t’i hyjë në punë për të afruar biznesin pavarësisht se i duhet të adoptojë ato skema që dikur i ka urryer dhe sharë pafundësisht...