Pango: Neni 53 i statutit të Federatës, do të ndryshojë

Pango: Neni 53 i statutit të Federatës, do të ndryshojë

Ministri i Turizmit nënshkruan statutin e FSHF-së


Ministri i Turizmit, Kulturës, Rinisë dhe Sporteve, Ylli Pango dhe Presidenti i Federatës Shqiptare të Futbollit, Armando Duka ranë dakord dje për hapjen e bisedimeve për zgjidhjen e probleme që kanë ngurtësuar kohët e fundit marrëdhëniet mes dy institucioneve në fjalë. Gjatë një takimi që ata kanë zhvilluar dje, është firmosur statuti i Federatës Shqiptare të Futbollit me shtetin. Gjatë takimit institucional, të iniciuar nga Kreu i shtetit, u diskutua rreth pezullimit të ekipeve tona kombëtare të futbollit nga veprimtaritë ndërkombëtare sportive dhe gjetjes së një zgjidhjeje përfundimtare të kësaj çështjeje tepër shqetësuese dhe me një ndjeshmëri të jashtëzakonshme kombëtare. Nga ana e tij, Presidenti Topi shprehu mbështetjen dhe gatishmërinë e plotë institucionale për të inkurajuar këtë proces brenda kompetencave ligjore dhe kushtetuese dhe për të shërbyer si katalizator për zgjidhjen e menjëhershme të kësaj çështjeje, duke gjetur mirëkuptimin dhe gatishmërinë e palëve për arritjen e një kompromisi dhe zgjidhjeje ligjore dhe afatgjatë. Pas takimit me presidetin Topi dhe kreun e FSHF-së, Duka, ministri Pango në një prononocim për median tha se ka vendosur të firmosë statutin e FSHF-së duke përjashtuar nenin 53."Është vendosur ajo që kisha propozuar më parë, që të firmosej statuti i FSHF-së pa nenin 53, sepse ishte një nen absurd dhe i pabazuar në ligjin shqiptar. Pasi kemi biseduar edhe në prani të presidentit Topi kemi vendosur të miratojmë propozimin e FIFA-s. Neni 53 do të ngrijë, do të firmoset statuti pa këtë nen, dhe FIFA dhe UEFA do të heqin pezullimin", theksoi ministri Pango. Ai theksoi se neni i cili ka bërë që federata të ketë konflikt të hapur me ministrinë, do të rishikohet. "Neni 53 i statutit thotë se FSHF-ja dhe anëtarët e tij, janë pronarë të të gjitha të drejtave që dalin nga garat dhe ngjarjet e tjera që vijnë nga juridiksioni respektiv i tyre, pa asnjë kufizim në përmbajtje, kohe, vend dhe ligje. Për nenin 53 ka ardhur dhe një vendim nga organizmi më i madh i futbollit, që detyron federatën ta ngrijë këtë nen deri në Asamblenë e jashtëzakondëshme të muajit Maj", tha më tej ministri i Turizmit. Ai theksoi se pikërisht konflikti për këtë nen dhe mos tolerimi dhe papërgjegjshmëria e Federatës Shqipëtare të Futbollit, solli dhe përjashtimin e sportit më popullor në Shqipëri nga organizmat ndërkombëtar FIFA-s dhe UEFA-s. Sipas ministrit, me ngrirjen e këtij neni, të dyja palët do të angazhohen duke ngritur dhe grupe pune për të hartuar një nen të ri që të jetë i pranueshëm. Neni i ri që pritet të hartohet nga grupet e punës, do të miratohet në asamblenë e radhës dhe më pas do të firmoset nga ministri Pango. Pas këtij akordi të arritur nga ministria dhe federata, Shqipërisë pritet t`i hiqet pezullimi që iu është bërë nga organizmi më i madh qeveritar i futbollit, FIFA.


Historia e konfliktit ndërmjet federatës dhe ministrisë


Konflikti tre vjeçar midis ministrisë së Kulturës Turizmit Rinisë dhe Sporteve, është drejtë zgjidhjes. Kjo ka ardhur dhe nga detyrimi që FIFA i ka bërë fedetarës që të merrte me përparësi sugjerimet e ministrisë dhe jo të ironizonte me to. Nga dyshimet e para nga ministria për keqmenaxhim të fondeve, u pa e arsyeshme që taksat e shqiptarëve të kontrolloheshin si shpenzoheshin nga Duka. Në atë kohë ministër ishte Bujar Leskaj, i cili e kundërshtoi arbitraritetin e kreut të federatës dhe i kërkoj atij që të ishte transparent. Gjyqi i hapur mes ministrisë dhe FSHF-së i dha të drejtë shtetit shqiptar, pasi federata duhet t`i lejonte shtetit auditet për taksat e qytetarëve. Çështja u la pezull, pasi FSHF-ja nxitoi ta çonte çështjen në apel. Kjo i dha legjitimitetin ligjor dhe moral shtetit që të kontrollonte fondet e Federatës. Pas një periudhe reflektimi, ministria nuk bëri asnjë veprim deri në përfundim të verdiktit të gjykatës. Humbjet e fundit të Kombëtares shqiptare, krijuan dyshime të forta për shitje ndeshjesh nga ana e Federatës. Ministria e Sportit dhe ajo e Financave nisën një grup auditi në Fedetatë, për të kontrolluar fondet që shteti i ka akorduar asaj. Ky grup nuk u lejua që të kontrollonte fondet nga zyratarë të lartë të federatës me pretekste absurde. Pezullimi i kombëtares, u quajt një fitore nga Duka ndaj shtetit dhe jo si një e keqe që i bëhej futbollit shqiptar. Kjo bëri që ministria të angazhohej totalisht për zgjidhjen e kësaj çështjeje, ndërsa Fedarata ndenji pasive. Pasi u bënë të gjithë përpjekjet e ministrisë, FIFA e detyroi federatën të ngrejë një grup ekspertësh dhe t`u japë fund arrogancës së drejtuesve të saj.